A hâi leh lo lăm pêi cheăng mơjiâng thôn pơlê nếo ƀă tíu kơdrâm kuăn pơlê rêh ối tê mơdró rơkê apoăng rơnó Hơngui Quý Mão hơnăm 2023, 10 tơring, pơlê kong kơdrâm dêi kong pơlê Kon Tum po rơdâ pêi pro hên tơdroăng cheăng ki nhên vâ mơjiâng thôn pơlê nếo ƀă tíu kơdrâm kuăn pơlê rêh ối tê mơdró rơkê, môi tiah: mơjiâng pro troăng kân ƀê tông thôn pơlê; mơhno ngiâ méa troăng kân kuăn pơlê pơkuâ xêh ngiât – krúa lĕm – lĕm; hnê kih thuât, hdrê pêt mơnăn păn ăm kuăn pơlê mơnhông mơdêk  ƀă hía hé.

Cho tơring ối tung rơpŏng pá puât dêi kong pơlê Kon Tum, pôa Võ Trung Mạnh, Kăn hnê ngăn Vi ƀan tơring Tu Mrông tối ăm ‘nâi, tơring lo lăm pêi cheăng mơjiâng pro mâu tơmeăm, mâu tơdroăng tơmiât troh pơxúa dêi kuăn pơlê ƀă pơlê pơla:

“Klêi kơ’nâi Leh mơhnhôk lo lăm pêi cheăng apoăng hơnăm Vi ƀan tơring po rơdâ pêi pro mâu tơdroăng pêi cheăng, tung mê tơkŭm pêi pro tro Tơdroăng pơkâ xiâm tơnêi têa. Tơkŭm po kơchơ tê Sâm Ngọc Linh ƀă tơdroăng ôm hyô châ hên tơdroăng châ tơƀrê ăm kuăn pơlê, ăm khu tê mơdró ƀă ăm tơring.

Pêi pro tơdroăng tâp trăng ‘nhâng kơxái on tơhrik thôn pơlê, pơlê tơniăn lĕm, rơkê. Lo lăm séa ngăn, mơdât tơmeăm ki ôh tá xê khât, tơmeăm ki lu lêa, tơmeăm ki ôh tá dâi lĕm, ki má lối cho mâu tơmeăm tơdjâk troh pơkeăng Sâm Ngọc Linh. Po rơdâ pêi pro mâu tơmeăm, mâu tơdroăng tơkêa bro tơniăn dâi lĕm, châ tơƀrê ƀă tơniăn’’.

Tung mâu hâi apoăng hơnăm nếo, khu râ kăn pơkuâ hnê ngăn cheăng Đảng, Vi ƀan kuăn pơlê, Hô̆i đong kuăn pơlê ƀă Vi ƀan Măt trâ̆n tơnêi têa kong pơlê Dak Lak hiăng mơjiâng 4 khu pêi cheăng vâ troh lăm pôu, trâm mâ kăn ƀô̆, mâu ngế cheăng a mâu kŏng ti, tíu cheăng tung kong pơlê vâ mơhnhôk mâu tíu cheăng tơkâ hluâ pá puât, pêi châ tơƀrê hên tung hơnăm 2023.

Ki nhên, mâu khu râ kăn pêi cheăng hiăng troh lăm pôu Kŏng ti pêi cheăng tiô rơnó môi khu pơchoh chêp hmân ếo Lục Thiêm Dak Lak; Kŏng ti pêi cheăng tiô rơnó môi khu kơphế xú hŏm; Kŏng ti pêi cheăng tiô rơnó môi khu Tê rôe ngi kong têa 2/9; Hngêi kơmăi Ƀier Sài Gòn Dak Lak ƀă Kŏng ti hrik chuâ têa xing xoăng ăm kuăn pơlê Dak Lak.

A Hngêi kơmăi ƀier Sài Gon Dak Lak, pôa Phạm Ngọc Nghị, Kăn phŏ pơkuâ hnê ngăn cheăng Đảng kong pơlê, Kăn hnê ngăn Vi ƀan kong pơlê rơtế khu râ kăn pêi cheăng hiăng troh lăm pôu kơpong pêt mơjiâng tơmeăm, trâm mâ, tơpui tơno ƀă mâu kŏng nhân ƀă pêi cheăng ƀă Khu râ kăn pơkuâ Hngêi kơmăi.

Tung hơnăm 2022 Hngêi kơmăi hiăng mơjiâng pro lối 100 rơtuh lit, nâp liăn ngân tơnêi têa ăm kong pơlê vâ chê 900 rơtal liăn, châ vâ chê 10% tâi tâng xo hnoăng liăn ngân dêi kong pơlê. Hngêi kơmăi xuân xuân mơ’no vâ chê 1 rơtal liăn vâ pêi pro tơdroăng kum rêh ối pơlê pơla a kong pơlê.

Teăng mâ Khu râ kăn pơkuâ kong pơlê, pôa Phạm Ngọc Nghị - Kăn phŏ pơkuâ hnê ngăn cheăng Đảng kong pơlê, Kăn hnê ngăn Vi ƀan kong pơlê Dak Lak kheăn kơdeăn păng ‘nâng tơdroăng mơ-eăm tơkâ hluâ pá puât dêi Hngêi kơmăi Ƀier Sài Gon Dak Lak tung hơnăm 2022, tơdrêng amê ƀă tơdroăng châ tơƀrê hiăng châ tơbrê tung hơnăm hiăng hluâ, Hngêi kơmăi pơtối mơnhông mơdêk ivá tung tơnêi têa, djâ tơdroăng pêt mơjiâng tơmeăm, tê mơdró châ tơƀrê hên tung la ngiâ.

“Á pói vâ mâu vâi ngoh mơnhông mơdêk mâu tơdroăng châ tơƀrê dêi hơnăm 2022, pro ti lâi pơtối rŭm môi tuăn, môi tuăn ai mâu tơdroăng pơ’lêh nếo, tơmiât pêi rơkê nếo ôh tá xê to ƀier Sai Gon mê cho mâu tơmeăm ki ê nếo. Pin xuân châ pơkâ pêi cho tê tung kơchơ mơdró lâp plâi tơnêi, pói tơngah kô pêi lo liăn hên tâ, mơnhông mơdêk tâ. Teăng mâ ăm khu râ kăn pêi cheăng pâ rơkâu mâu pú rơtế rơpŏng môi hơnăm nếo hơniâp lĕm, tơniăn mo châ mơnhông mơdêk ƀă Kŏng ti rế hía rế mơnhông mơdêk lĕm tâ’’.

Koh phiu ro leh tơbâ 93 hơnăm hâi mơjiâng Đảng ƀă tơmiât troh leh tơbâ 15 hơnăm hâi mơjiâng pơlê kong krâm Ƀuôn Hồ, Vi ƀan pơlê krâm Ƀuôn Hồ, kong pơlê Dak Lak hiăng tơkŭm po pơxiâm mơjiâng pro 4 tơmeăm ki xiâm, tơkŭm tung kơvâ troăng klông ƀă tâi tâng kơlo mơ’no liăn dâng 37 rơtal liăn, tiô tối hdrối pêi kêi đeăng a khế 4,5,6 ƀă khế 7,8,9 hơnăm kố. Mâu tơmeăm kố vâ kum rak tơniăn hngêi trăng, troăng klông, tơxâng tơdroăng kal vâ prôk lăm dêi kuăn pơlê.

Ing mê, chôa ‘lâng mơjiâng pơlê kong krâm Ƀuôn Hồ châ tro mâu pơkâ tíu kơdrâm kuăn pơlê rêh ối rê mơdró túa III a hơnăm 2025 tiô Pơkâ Hneăng hôp Đảng ƀô̆ kong pơlê Dak Lak roh má XVII.

Pôa Đặng Gia Duẩn, Kăn hnê ngăn Vi ƀan pơlê kong krâm Ƀuôn Hồ tối ăm ‘nâi, ƀă tơdroăng tơkŭm po mơjiâng sap apoăng hơnăm, pơlê kong krâm khŏm mơ-eăm xúa châ tơƀrê mâu kơxô̆ liăn mơ’no cheăng dêi Tơnêi têa. Tơdrêng amê, kô thăm pêi pro rơdêi mơhnhôk mâu kơxô̆ liăn mơ’no cheăng, mơ-eăm mơjiâng pơlê kong krâm Ƀuôn Hồ chiâng Tíu xiâm cheăng kâ, mơhno khôi túa lĕm tro dêi kơpong peăng Kơnhŏng kong pơlê Dak Lak, ai hnoăng kal khât tung tơtêk dêi kơpong:

“Ƀă môi tơdroăng khŏm mơ-eăm ‘na kal kí kân mê Đảng ƀô̆, Hô̆i đong kuăn pơlê, Vi ƀan kuăn pơlê kong krâm dế mơ-eăm rêm hâi, ƀă pơxiâm ing tơdroăng pêi pro mâu tơmeăm ki xiâm vâ mâu troăng kân kân lĕm rơdâ tâ, ngiât lĕm tâ, tiô rơxông nếo tâ, tơxâng ƀă môi pơlê kong krâm. Tơdrêng amê, tung la ngiâ ngin kô tơleăng mâu tơdroăng ki kreăng ‘na pơkâ pêi vâ kô chiâng krếo tơ’nôm mâu khu mơ’no liăn cheăng, ai tơ’nôm mâu tơmeăm, kum Ƀuôn Hồ rế hía rế tiô rơxông nếo tâ’’.