Ai mâ a Tíu xiâm Ƀơrô cheăng dêi kong pơlê Dak Lak a hâi pêi cheăng ki apoăng klêi kơ’nâi rôh pơtê Têt Lo hơnăm nếo Quý Mão, ngoh Trần Tuấn Song, a cheăm Čư̆ Êbur, pơlê kong kơdrâm Ƀuôn Ma Thuột hơniâp ro xua mâu hlá mơ-éa ki bro châ pêi pro rĕng drêng ngoh bro hlá mơéa krê dêi tơná vâ vêh Pơlê kong kân Hồ Chí Minh pêi cheăng.

“Kố cho hâi pêi cheăng ki apoăng klêi kơ’nâi rôh pơtê Têt, á troh a kố bro mơ-éa lĭ lịch tư pháp. Á hlo hiâm mơno dêi kăn ƀô̆ viên chưk tro khât ƀă kuăn pơlê, chêh bro hlá mơ-éa rĕng khât”.

Tung hâi ki apoăng pêi cheăng klêi kơ’nâi rôh pơtê Têt Lo hơnăm nếo, kơxô̆ ngế troh bro hlá mơéa a Tíu xiâm Ƀơrô cheăng dêi kong pơlê Dak Lak tá hâi hên. Laga, tâi tâng mâu kăn ƀô̆, kong chưk, viên chưk hiăng vêh pêi cheăng ƀă ivá hơniâp ro, hbrâ rơnáu kum lĕm tro má môi ăm tơdroăng ki vâ bro hlá mơ-éa dêi kuăn pơlê.

Jâ Đinh Thị Hương, Chuyên viên Ƀaoh hiêm pơlê pơla kong pơlê Dak Lak tối:

“Tâi tâng nhŏng o dêi Tíu xiâm Ƀơrô cheăng dêi kong pơlê Dak Lak lăm pêi cheăng tŭm ƀă tro chôu, hiâm mơno hơniâp ro. Tâi tâng nhŏng o tung tíu xiâm ƀă kơ koan Ƀaoh hiêm pơlê pơla ƀă hiâm mơno kum cho tơdroăng ki xiâm vâ ăm rêm ngế pơrá hơniâp ro, drêng lo vêh vâi xuân hơniâp ro ƀă tíu xiâm kố”.

A kơpong pêi cheăng ƀă kơmăi kơmok Tân An, pơlê kong kơdrâm Ƀuôn Ma Thuột, Kŏng ti Tơlo liăn Ban Mê Green Farm tơkŭm lo lăm pêi cheăng, uâ pơliê sầu riêng, hăng vâ tê kế tơmeăm rôh ki apoăng dêi hơnăm nếo ngi kong têa Sinuâ, Nhuk. Jâ Nguyễn Thị Thái Thanh, kăn pơkuâ Kŏng ti Tơlo liăn Ban Mê Green Farm ăm ‘nâi, tung plâ pơtê Têt kố nah, mâu tơdroăng cheăng tê mơdró, tơdjêp ƀă tơmối kong têa ê xuân châ rak vế. Kơnôm tiah mê, kŏng ti pơtối ai mâu đơn roê kế tơmeăm ki nếo ƀă lo lăm pêi cheăng apoăng hơnăm nếo ƀă tơdroăng ki hơniâp ro khât.

“Nôkố, kơxô̆ hlá đơn kok roê kế tơmeăm hiăng hên hĭn khât ăm hnăm 2023, tâk 3 xôh tâng pơchông ƀă hơnăm 2022, Ƀă mâu kế tơmeăm môi tiah plâi sầu riêng, ƀơr, hăng ƀă krui kơxái. Vâ châ mâu đơn ki kok roê kế tơmeăm vâ tê ngi kong têa ê ngin pơxiâm uâ pơliê sap ing hâi má 6 ƀă đơn kok roê kế tơmeăm ki apoăng cho sầu riêng ƀă hăng”.

A klâng, kơdrum deăng, tung mâu hâi hdrối kố nah, kuăn pơlê ki pêi chiâk deăng Dak Lak xuân hiăng vêh ƀă tơdroăng cheăng ki rak ngăn mâu hdrê pêt, mơnăn păn klêi kơ’nâi mâu hâi pơtê Têt Lo hơnăm nếo. Bô bố xuân lo tơngah kô châ ƀlêi chiâng hên mâu tơdroăng tung hơnăm nếo, kế tơmeăm châ xo hên, yă tê tơniăn ƀă to kơnâ.

Ngoh Phan Quốc Thế, a cheăm Ea Kpam, tơring Čư̆ Mgar, kong pơlê Dak Lak tối:

“Tiô kuăn pơlê ki pêt kơphế mê apoăng rơnó Hơngui xuân cho apoăng rơnó tô, xua mê athế ngăn kơphế lo reăng hiăng tŭm há vâ tôh têa, poê tơkâng klêi kơ’nâi krí, tôh têa hbrâ ăm apoăng rơnó nếo. Tơdroăng kuăn pơlê pêi chiâk rơhêng vâ má môi cho kong mêi tro, tô ‘ló, yă tê kế tơmeăm tơniăn, mâu hơnăm a chê kố yă tê kế tơmeăm hlo chu rơpâ kuăn pơlê xuân ôh tá tơniăn”.

Xuân môi tiah mê, mâu cheăm, tơring a kơpong Tây Bắc hiăng tơkŭm po hên tơdroăng cheăng ki pơxiâm pêi cheăng apoăng hơnăm nếo tung tơdroăng ki hơniâp ro, mơ-eăm tung môi hơnăm châ ƀlêi chiâng tâ. Nâ Cà Thị Lê a pơlê Giảng Lắc, bêng Quyết Thắng, pơlê kong kơdrâm Sơn La ăm ‘nâi: Hâi apoăng rơnó Hơngui hơnăm kố, mâu ngế tung rơpŏng rơtế dêi rơpó tơkŭm lâk toih ƀă rơhêng vâ kô ai môi hơnăm nếo kong mêi tro, tô ‘ló, mâu tơdroăng cheăng tơniăn lĕm, malối cho châ tê kế tơmeăm tâ vâ mơdêk pêi lo liăn ăm rơpŏng hngêi:

“Lo lăm pei cheăng tung hơnăm nếo mê hơnăm kố á rơhêng vâ châ xo hên kế tơmeăm, kong mêi tro, tô ‘ló, châ pêi lo liăn ăm rơpŏng hngêi phâi hơtô”.

Tung pơla a Kŏng ti Tơlo liăn kơtếo pro xik Sơn La, hâi ki apoăng dêi hơnăm, tơdroăng cheăng hiăng hlo hơniâp ro tung lâp lu kơpong ki pêt kơtếo dêi hngêi kơmăi ƀă mâu tíu ki uâ kơtếo. Tiô túa pơkâ, rơnó 2022 – 2023, kŏng ti mơ-eăm po rơdâ kơpong pêt kơtếo tâk troh 9.500 ha, kơtếo châ lối 600 rơpâu tâ̆n, uâ bro châ 70 rơpâu tâ̆n xik.

Pôa Bùi Minh Tuấn, kăn ƀô̆ Kŏng ti Tơlo uâ kơtếo pro xik Sơn La ăm ‘nâi: Klêi kơ’nâi hâi má 3 Têt, ngoh ƀă rơtế ƀă kăn ƀô̆ pơkuâ kơpong pêt kơtếo dêi kŏng ti hiăng lăm chu troh a cheăm tơring hnê tối, mơhnhôk mâu rơpŏng lo lăm pêi cheăng ko kơtếo tiô pơkâ vâ rak tơniăn 5 rơpâu tâ̆n kơtếo ăm hngêi kơmăi uâ tung 1 hâi, kum ăm mâu tơdroăng ki uâ pơliê sap ing hâi má 4 Têt:

“Vâ rak tơniăn ăm túa pơkâ pêi cheăng dêi hngêi kơmăi, ngin mot hnê tối mơhnhôk vâi krâ nhŏng o kếo ko mâu xiâm kơtếo hiăng tŭm rơnó, lĕm ƀă hnê tối nhŏng o vê rơxế chơ tro tơdroăng ki ăm phêp, tro tiô luât pơkâ”.

Ƀă a mâu kong pơlê Lào Cai, Yên Bái hiăng tơkŭm po Leh tơbleăng “Têt pêt loăng plâ rơxông pâ Pôa Hồ” ƀă mâu tơdroăng cheăng pêt loăng ngiât pơtối pêi pro tơdroăng tơkêa “Pêt 1 rơtal xiâm loăng ngiât pơla hơnăm 2021 – 2025” xua Ngế pro xiâm hnê ngăn Chin phuh tơbleăng xuân hiăng châ tơbleăng hên hĭn a tâi tâng mâu cheăm tơring dêi péa kong pơlê.