Jâ Kpuih H’Joi, 40 hơnăm ối a pơlê Sung Kép, cheăm Ia Kla, tơring Đức Cơ, kong pơlê Gia Lai cho rơpŏng châ pơxúa ing tơdroăng mung liăn kum rêh ối pơlê pơla. Hdrối nah, rơpŏng jâ H’Joi ối tung rơpŏng kơtiê, tơdroăng rêh ối pá puât. Kơnôm châ mung 80 rơtuh liăn ing kơxô̆ liăn mung kum rêh ối pơlê pơla, rơpŏng jâ H’Joi hiăng rơnêu hngêi ối ƀă ai kơxô̆ liăn mơ’no pêt 3ha loăng plâi hôt a chiâk deăng dêi rơpŏng. Ai hngêi krá lĕm, ai kơdrum loăng plâi vâ rak ngăn hiăng kum jâ H’Joi loi tơngah tâ vâ mơnhông cheăng kâ rơpŏng.

‘’Hdrối nah kong mêi mê tung hngêi thế xo kơtháo ƀă kơxô vâ dâ têa. Nôkố kơnôm tơnêi têa ăm mung nếo châ mơjiâng pro toăng hngêi nếo môi tiah kố mê xuân pâ mơnê. Ai hngêi xuân hmiên tuăn môi iâ vâ mơ’no liăn pêi cheăng kâ ăm tơdroăng rêh ối lĕm tro tâ’’.

-Mơngế hdroâng kuăn ngo a Gia Lai xúa kơxô̆ liăn kum rêh ối pơlê pơla vâ mơ’no liăn păn mơnăn mơnôa

Cheăm Ia Kla, tơring Đức Cơ cho cheăm kơpong II, ƀă kơxô̆ rơpŏng kơtiê ƀă vâ chê kơtiê hên, ki hên cho mơngế hdroâng kuăn ngo. Nôkố tung cheăm ai 1.056 rơpŏng châ mung kơxô̆ liăn ƀă kơxô̆ liăn chê̆n lối 63 rơtal liăn a Hngêi arak liăn kum rêh ối pơlê pơla tơring. Pôa Hoàng Đức Anh, Kăn hnê ngăn Viƀan cheăm Ia Kla tối ăm ‘nâi:

‘’Ing mâu kơxô̆ liăn mung mơnhông tơdroăng rêh ối kuăn pơlê, dêi vâi krâ, dêi kuăn pơlê chôa ‘lâng châo mơdêk ƀă tơniăn. Cheăm kô pơtối tơrŭm ƀă hngêi arak liăn kum Rêh ối pơlê pơla tơring vâ pêi pro mâu kơxô̆ liăn tiô tơdroăng pêi cheăng vâ troh lâp lu tơdrêng troh kuăn pơlê, troh mâu ngế ki châ pơxúa vâ pro ti lâi xiâm kối má mơ’nui thế mơdêk tơdroăng rêh ối kuăn pơlê’’.

-Kơxô̆ liăn kum rêh ối pơlê pơla kum kuăn pơlê pêt alâi sinh khô̆i djâ châ tơƀrê hên.

Rơpŏng on veăng nâ Siu Nhã (31 hơnăm) ƀă ngoh Đoàn Công Toàn (35 hơnăm) ối a tôh 6, pơlê kân Chư Prông, tơring Chư Prông xuân tơkâ hluâ pá puât kơnôm kơxô̆ liăn mung kố. Hơnăm 2022, rơpŏng nâ Siu Nhã hiăng xúa hiăng xúa 80 rơtuh liăn ing kơxô̆ liăn mung kum rêh ối pơlê pơla vâ mơ’no liăn mơnhông pêt mơjiâng tơmeăm khoăng. Nâ Nhã tối, pói vâ kân má môi dêi on veăng cho hlŭn ing kơtiê dế chôa ‘lâng chiâng tơdroăng chiâng khât.

‘’Hdrối nah mê tơdroăng rêh ối rơpŏng tá hâi tơniăn môi tiah nôkố. Sap ing on veăng mung liăn rêh ối pơlê pơla ƀă kơxô̆ liăn ki mê má mơ’no liăn cheăng pêt mơjiâng châ 1ha kơphế ƀă 400 xiâm tiêu, tơdroăng cheăng rơpŏng chôa ‘lâng tơniăn. Á mơ-eăm to lâi hơnăm la ngiâ mê hlŭn vâ chê kơtiê ƀă ai tơdroăng rêh ối tŭm tâ’’.

-Hên rơpŏng mơ-eăm hlŭn ing kơtiê, chiâng kro mơdrŏng

Pôa Từ Ngọc Thông, Kăn phŏ hnê ngăn Viƀan tơring Chư Prông, tối ăm ‘nâi, kơxô̆ liăn mung kum rêh ối pơlê pơla pêi pro tung tơring hiăng kum kơxô̆ rơpŏng kơtiê rêm hơnăm kơdroh 3%.

‘’Liăn mung kum rêh ối pơlê pơla cho môi tung mâu troăng pêi vâ pêi pro tơdroăng kơdroh kơtiê krá tơniăn. Ƀă pơkâ 40 hơnăm 2014 cho troăng prôk ki châ tơƀrê hluâ pơkâ ‘na xúa liăn ngân tơnêi têa vâ tŏng kum, pro tơ’lêi hlâu ai tơ’nôm liăn ngân vâ pêi pro mâu tơdroăng kum rêh ối pơlê pơla, liăn mung ăm pơlê pơla. Troh nôkố ngin hiăng mơdêk chôa ‘lâng hâi khế kơlo pơcháu tơdroăng cheăng vâ pêi rpo mâu troăng ‘na kơdroh kơtiê krá tơniăn tung tơring’’.

Troh nôkố, kơxô̆ liăn ăm mung kum rêh ối pơlê pơla hiăng pêi pro troh tâi tâng mâu cheăm kơpong hơhngế, hơhngo lâp kong pơlê Gia Lai. Tâi tâng kơxô̆ liăn ăm mung kơjo vâ chê 16.500 rơtal liăn, ƀă lối 500 rơpâu roh rơpŏng kơtiê, vâ chê kơtiê ƀă mâu ngế ai hnoăng châ mung liăn, tung mê mơngế hdroâng kuăn ngo châ vâ chê tơdế. Ing mê, kơxô̆ rơpŏng kơtiê dêi Gia Lai hiăng kơdroh sap ing lối 23% hơnăm 2014 chu u ối lối 8% môi tiah nôkố. Pôa Rah Lan Chung, Kăn phŏ pơkuâ hnê ngăn cheăng Đảng kong pơlê Gia Lai, tối ăm ‘nâi:

‘’Tung la ngiâ, tung tơdroăng ki nếo, tung tơdroăng rêh ối nếo, mâu tơdroăng xiâm ƀă tơdroăng nôkố pơkâ ối ai mâu tơdroăng ki mơni tá hâi tơtro. xua mê, Khu pơkuâ hnê ngăn cheăng Đảng kong pơlê ai pâ thế ƀă Tơnêi têa pơkâ thế mơjiâng Pơkâ dêi Khu xiâm kal kí ‘na thăm pơkuâ dêi Đảng ƀă tơdroăng mung liăn kum rêh ối pơlê pơla tung kong pơlê lâp tơnêi têa tối tơdjuôm ƀă Gia Lai vâ pro ti lâi xúa châ tơƀrê kơxô̆ liăn, kum kal khât tung roh mơjiâng ƀă mơnhông tơnêi têa xuân môi tiah kong pơlê Gia Lai’’.

Kơnôm kơxô̆ liăn mung mâu tơdroăng ăm mung rêh ối pơlê pơla, Gia Lai hiăng ai mâu troăng prôk xŏn tung pêi pro mâu tơdroăng pơkâ xiâm tơnêi têa ‘na kơdroh kơtiê krá tơniăn, mơjiâng thôn pơlê nếo, mơnhông cheăng kâ – rêh ối pơlê pơla kơpong hdroâng kuăn ngo ƀă kong ngo./.