Indonesia prế Việt Nam ai hên tơdroăng ki ai hlâu kân ‘na rơxế kơtâu ƀă on tơhrik ƀă Indonesia rơhêng vâ tơrŭm cheăng ƀă mâu khu mơdró kâ ƀă Chin phuh Việt Nam vâ mơjiâng bro tơdroăng ki xúa rơxế kơtâu ƀă on tơhrik kơpong ASEAN. Kố cho tơdroăng ki tối tơbleăng dêi pôa Arsjad Rasjid, kăn hnê ngăn Ƀơrô cheăng tê mơdró ƀă Kơmăi kmok Indonesia (KADIN), tơdrêng a mê xuân cho kăn hnê ngăn Hô̆i đong tiâ mơnhên tơdroăng tê mơdró ASEAN 2023 (ASEAN-BAC 2023).

Pôa Arsjad Rasjid tối tiah kố, kơchơ mơdró Đông Nam Á ai hên tơdroăng ki hlâu ƀă tơdroăng ki xúa rơxế mái kơtâu ƀă on tơhrik, ƀă ki kơnía dêi kơchơ mơdró tiô tối hdrối cho 2,7 rơtal dollars a hơnăm 2027. Indonesia tơhrâ kô mơdêk tơdroăng ki tơrŭm cheăng pơla kơvâ cheăng kơmăi kơmok rơxế kơtâu ƀă on tơhrik dêi Indonesia ƀă Việt Nam.

Tá péa tơnêi têa kố pơrá ai tơdroăng ki rơhêng vâ xúa hên ‘na rơxế kơtâu ƀă on tơhrik, Việt Nam cho tơnêi têa ki ai rơxế kơtâu ƀă on tơhrik hên má pái a Đông Nam Á ƀă Indonesia cho tơnêi têa ki ai rơxế ô tô hên má môi tung kơpong. Ƀă túa tơrŭm cheăng ƀă tối tơbleăng ăm dêi rơpó mâu tơdroăng ki rơkê plĕng xuân môi tiah mâu liăn ngân, péa tơnêi têa kố mơni kô tí tăng tâi tâng ki ai hlâu ‘na rơxế kơtâu ƀă on tơhrik tung kơpong ASEAN.