Nôkố rêm hâi, Kơpong ôm hyô Bàu Trắng U ƀă ME, cheăm Hòa Thắng, kong pơlê Lâm Đồng tơdah 3.000 troh 4.000 hdroh tơmối troh hyô ngăn, xup um ƀă xah hêi a mâu ngo kŭn to prêi rơbông lối 2ha. Pôa Nguyễn Văn Hùng - Ngế pơkuâ kơpong ôm hyô ăm ‘nâi, sap ing tơ’mot tơdjuôm troh nôkố, kơxô̆ tơmối troh tâk dâng 20% ƀă kô tâk hên drêng tơdjêp pêi pro ing kơpong têa kơxĭ ai prêi troh a pơlê xiâm ai hên rơpâu hdrê reăng Đà Lạt.

“Sap ing tơ’mot tơdjuôm troh nôkố ai tơrŭm pơla kong kế, têa kơxĭ ƀă ‘núa prêi mê cho môi tơdroăng ki kân vâ pin tơdjêp ƀă mâu khu tê mơdró tung kong pơlê. Kal má môi cho tơrŭm tơdjêp troăng prôk vâ tơmối tơ’lêi prôk lăm sap ing têa kơxĭ troh kong ngo rơpâu hdrê reăng ƀă ing rơpâu to reăng prôk troh têa kơxĭ. Ki khât ăm hlo kong ki hiăng mơhno troăng vâ pêi cho tơrŭm tơdjêp pơla mâu tíu pêi cheăng ôm hyô, malối cho tíu pêi cheăng ki djâ mơhno mâu tíu ôm hyô mơjiâng pro mâu tơdroăng ki tŏng gum tơ’lêi hlâu drêng tơmối troh Đà Lạt vâ lăm a têa kơxĭ”.

Lâp tung kong pơlê nôkố ai lối 4.200 tíu koi pơtê ối, vâ chê 1.400 hngêi ăm tơmối kâ koi ối pơtê ing 1 - 5 hơlŏng, kâi vâ tơdah 48 rơtuh ngế troh rêm hơnăm. Krê tung hơnăm 2025, kong pơlê pơkâ tơ’mot 23 rơtuh ngế tơmối ôm hyô. Tiô Tiê̆n sih Phan Bảo Giang, Phŏ Pơkuâ hngêi trunghlối cho Kăn pơkuâ kơvâ Marketing hngêi trung Đại học Kinh tế Tài chính Pơlê kong kân Hồ Chí Minh, pơla hơnăm 2025-2030, drêng hăng pơ’lêh mâu tơdroăng cheăng, túa pêi cheăng dêi kong pơlê, hlối tơdjêp tro ƀă mâu kơchơ mơdró, tíu ôm hyô Lâm Đồng kố cho tíu xiâm cheăng kâ ki khât:

“Pin kal kơchuâ môi to lơ gât hdrối kơxô̆ tơmối troh tơrêm rôh a mâu tíu ai ôm hyô dêi kong pơlê Lâm Đồng nếo. Pin hlo rêm tíu sap ing Dak Nông, Lâm Đồng, ta troh Bình Thuận ton nah xuân ai mâu style cho túa pêi pro rêh ối ki pơrá phá dêi pó mê tung môi tơdroăng pêi pro ki kân tiah kố ngin ai hên ngế vâ môi tuăn, rơtế ‘no ivá mê ngin loi khât tŭm tơdroăng ki pá kô kâi tơkâ luâ”.

Tiô tơdroăng chêh pơkâ pơtroh ăm Hneăng hôp Đảng ƀô̆ kong pơlê Lâm Đồng rôh má môi hneăng 2025-2030, Ôm hyô cho môi tung pái tơdroăng ki xiâm cheăng kâ kal khât dêi kong pơlê, pakĭng pêi chiâk xúa kơmăi kơmok dâi lĕm hlối cheăng ƀă kơmăi kơmok- mơjiâng pro tơmeăm khoăng lĕm nếo nôkố. Tung pơla tơbriât tê mơdró ó, Lâm Đồng tơmâng khât mơjiâng tơmeăm ôm hyô ki kal, mơnhông ‘na xúa kong ngê̆ kơxô̆ tung tơbleăng tơmeăm khoăng ƀă rak ngăn, hlối mơnhông tơrŭm cheăng pơla tơnêi têa ƀă kuăn pơlê vâ tơ’mot hên khu ‘no liăn pro tơmeăm khoăng mơnhông krá kơvâ cheăng kơmăi kơmok ki ôh tá ai ngôi on. Pôa Nguyễn Văn Lộc, Ngế pơkuâ Khu xiâm ngăn Túa lĕm tro, Tơ’noăng ivá ƀă Ôm hyô kong pơlê Lâm Đồng tối tiah kố, ki xiâm kal má môi cho rơtế ƀă khu mơdró. Tâng pro ôm hyô la ôh tá ai khu mơdró kô lŭp tâi:

“Môi tơdroăng kal ê nếo mê cho rơtế ƀă khu mơdró. Tâng pro ôm hyô la ôh tá ai tơrŭm ƀă khu mơdró kô lŭp tâi. Kơvâ ngăn túa lĕm tro, Tơ’noăng Ivá ƀă Ôm hyô ngin tơhrâ kô rơtế ƀă Khu mơdró vâ ngin rơtế ƀă hvêa chêng prôk. Mâu khu mơdró veăng kơjo kum pơlê cheăm tung mơjiâng pro mâu tíu, ‘mâi pro nếo mơnhông um méa dêi môi tíu ôm hyô Lâm Đồng ki nếo”.

Vâ pêi mâu pơkâ mơnhông ôm hyô châ tơƀrê hên, kong pơlê Lâm Đồng dế tơkŭm ‘no liăn, pro mâu kơpong ôm hyô ki kân râ tơnêi têa ƀă lâp plâi tơnêi môi tiah long Tuyền Lâm, Mũi Né, Tà Đùng, rơtế ƀă mâu tơmeăm ôm hyô kal ki ê: ôm hyô ngăn nhâ loăng kuăn kiâ, tíu ối pơtê, tíu pơtâp ivá ki rơ-iô, ôm hyô ngăn chiâk deăng, ôm hyô ngăn hơdruê, rak ngăn ivá ƀă ngăn túa lĕm tro dêi pơlê. Pôa Hồ Văn Mười, Phŏ kăn hnê ngăn Tỉnh ủy, Kăn hnê ngăn Vi ƀan Kuăn pơlê dêi kong pơlê Lâm Đồng ăm ‘nâi, vâ kong pơlê Lâm Đồng chiâng tíu xiâm ôm hyô tơƀrê lĕm, tơdroăng ki kal cho mơjiâng pro tơmeăm khoăng hiăng ai hlâu dêi pái kơpong: “Rơpâu to reăng, kong ngo lĕm lih ƀă têa kơxĭ ngiât”.

“Ki pơxúa pin kân rơdâ mâ ngăn hơngế. Tuăn tơmiât kal khât, tơƀrê, hriăn plĕng ki nếo. Kơpong kong ngo, kơpong têa kơxĭ ngiât ƀă rơpâu hdrê reăng môi tiah mơhâu on pái to chêng mê, cho krá kâk la pái to mơhâu on kố hâi teăm tơ’mô dêi rơpó. Vâ kơxô̆ tơmối troh ôm hyô châ hên, lơ hên luâ tiô pơkâ dêi tơná cho thế pro tơniăn pơlê pơla. Tơniăn ‘na troăng prôk lăm, klêi mê tơniăn mo lĕm ivá vâ tơniăn ăm tơmối. Rêm ngế kuăn pơlê cho môi ngế hnê mơhno ôm hyô ngăn. Mâu tíu ôm hyô đi đo hlo tó hâk ro, đi đo ai ki rơhêng vâ tơpui lĕm hlế pâ tơmối chiâng túa lĕm tro vêa vong”.

Ƀă mâ ngăn rơdâ tâ, ki mơ-eăm dêi mâu kăn, ki rơtế vâ tơrŭm ƀă dêi mâu khu mơdró ƀă kuăn pơlê, Lâm Đồng dế chôa hvêa prôk pêi pro tơdroăng púi vâ tơngah chiâng Tíu xiâm ôm hyô ki lĕm, pro xiâm tung tơdroăng cheăng mơnhôk tơƀrê ‘na cheăng kâ - pơlê pơla lâp kơpong  Tây Nguyên ƀă Tơnêi têa. Ôm hyô Lâm Đồng - ing tơmeăm khoăng ai hlâu troh pêi pro tâi tiô tơdroăng púi vâ mơnhông tơƀrê dế tung pơla hvêa prôk nếo dêi môi tơdroăng pêi pro ki nếo.