Hâi lơ 29/7, Khu râ kăn teăng mâ Kuô̆k hô̆i Pơlê kong kân Hà Nội tơkŭm po hôp pêi kêi đeăng tâi tâng Kăn pơkuâ Khu hneăng má XV. Klêi kơ’nâi têk kŏng môi tuăn tơbleăng inâi tâ phĭu rah xo kăn pơkuâ, mâu kăn teăng mâ hiăng tơkŭm tâ phĭu kí vâ rah xo Kăn pơkuâ khu râ kăn teăng mâ Kuô̆k hô̆i pơlê kong kân. Klêi kơ’nâi tâ phĭu, 100% mâu kăn teăng mâ hiăng rah xo jâ Bùi Thị Minh Hoài, Kăn cheăng tung Khu xiâm kal kí, Kăn pơkuâ hnê ngăn cheăng Đảng pơlê kong kân pro Kăn pơkuâ khu râ kăn teăng mâ Kuô̆k hô̆i hneăng má XV pơlê kong kân Hà Nội, hneăng hơnăm 2021 – 2026.

Xông tơpui tơdah hnoăng cheăng, tối tơdroăng ki hâk tơngăm drêng châ mâu kăn teăng mâ Kuô̆k hô̆i tung Khu ki loi tơngah păng ‘nâng rah xo jâ Bùi Thị Minh Hoài pro Kăn pơkuâ khu, Kăn pơkuâ hnê ngăn cheăng Đảng pơlê kong kân tối ăm ‘nâi kô mơ-eăm tâi ivá tơná, tơrŭm krá tơniăn ƀă mâu khu râ kăn pơkuâ Khu, mâu kăn teăng mâ Kuôk hô̆i rak pơkâ, mơdêk tơdroăng ki djâ troăng ahdrối, pêi pro hnoăng cheăng tiô pơkâ pêi cheăng dêi kăn teăng mâ Kuô̆k hô̆i ƀă Khu râ kăn teăng mâ Kuô̆k hô̆i pơlê kong kân.