Drêng troh leh tơbâ 34 hơnăm hâi Mâu lêng tíu tơkăng kong tâi tâng kuăn pơlê, 64 hơnăm hâi tơbâ mơjiâng Mố đô̆i gak tơkăng kong Việt Nam ƀă 60 hơnăm hâi pêi pro tiô hmâ dêi Học viện Biên phòng, kơxo lơ 28/2, jâ Võ Thị Ánh Xuân, râng hnoăng kăn xiâm hnê ngăn tơnêi têa lăm pôu pêi cheăng a Học viện Biên Phòng - Tíu xiâm hnê mơjiâng kăn ƀô̆ ƀă tí tăng ‘nâi plĕng khoa hok dêi mâu lêng Mô đô̆i Biên Phòng a pơlê kong krâm Sơn Tây, Hà Nội.

Jâ Võ Thị Ánh Xuân, râng hnoăng Kăn xiâm hnê ngăn tơnêi têa rơkâu mâu kăn ƀô̆, mâu lêng, dêi Học viện Biên phòng

Tơbleăng a rôh pêi cheăng, jâ Võ Thị Ánh Xuân tối nhên, xua ai Kăn xiâm hnê ngăn Quân ủy Trung uơng, Khu xiâm pơkuâ ngăn lêng mê ki ngăn tơdrêng cho  Khu xiâm ngăn ‘na luât dêi Mố đô̆i gak tơkăng kong, Học viện Biên phòng hiăng mơ-eăm mơjiâng tíu pêi cheăng krá rơdêi tung tŭm tơdroăng, pêi pro 2 hnoăng cheăng hlối cho tíu xiâm hnê mơjiâng tí tăng ‘nâi plĕng khoa hok ƀă hlối cho khu ki hbrâ tơplâ dêi khu xiâm pơkuâ ngăn lêng tơkăng kong.

Tung pơla nôkố dế ai pơkâ, hnoăng cheăng pêi rế hngăm ƀă Mố đô̆i gak tơkăng kong tối tơdjuôm, ƀă Học viện Biên phòng tối krê tung tơdroăng mơjiâng, rak ngăn ƀă kring vế hnoăng pơkuâ tơniăn tíu tơkăng kong tung tơdroăng nếo nôkố.