Kơxo lơ 2/6, a Hà Nội, jâ Võ Thị Ánh Xuân, Kăn xiâm phŏ hnê ngăn tơnêi têa hiăng troh pôu Hngêi pơkeăng pơlât vâi hdrêng Tơnêi têa ƀă diâp tơmeăm ăm vâi hdrêng ki châi tamo ai tơdroăng rêh ối xơpá drêng Khế tŏng kum vâi hdrêng Việt Nam. Rêm hâi tơdah sap ing 3.500 – 4.500 ngế hdrêng troh khăm, Hngêi pơkeăng pơlât vâi hdrêng Tơnêi têa đi đo ai dâng 2 rơpâu ngế vâi hdrêng châi tamo pơlât koi tung hngêi pơkeăng.

Kố cho tíu khăm pơlât chuyên khoa Nhi râ ki má mơ’nui mê ai hên ngế ki tamo râ. Mơhnhôk kăn ƀô̆, viên chưk hngêi pơkeăng tơkŭm pơlât ăm mâu vâi muăn tơxĭn, jâ Võ Thị Ánh Xuân pơchân: mâu khu ƀok thái pơkeăng kal ai hiâm mơno lĕm, rế rơkê tơdroăng cheăng dêi tơná, rế ai hên hiâm mơno lĕm vâ pơlât vâi hdrêng ƀă hên ki ê.

Jâ Võ Thị Ánh Xuân hiăng diâp 50 rơtuh liăn vâ Hngêi pơkeăng pơlât vâi hdrêng Tơnêi têa tŏng kum mâu vâi hdrêng ki ai tơdroăng rêh ối xơpá; Tơdrêng a mê hlối rơtế ƀă mâu kăn ƀô̆ teăng mâ Khu râng liăn Tŏng kum vâi hdrêng Việt Nam, Khu râng liăn kum mâu ngế ki châi tamo ŭm tung châ – Kơxo ah bâ eăng lĕm diâp 200 hnoăng tơmeăm ăm mâu vâi hdrêng ki châi tamo xơpá a Tíu xiâm pơlât Ŭm tung châ ƀă tíu xiâm pơlât kôk rơxok.