Jâ Võ Thị Ánh Xuân, Kăn xiâm phŏ hnê ngăn tơnêi têa troh lăm pôu, diâp kơxuô tơmeăm, mơhnhôk mâu đông lêng Lưh đoân tuk ki mui tung têa kơxĭ 189, Khu lêng gâk kring têa kơxĭ, Lưh đoân tuk pêng têa 162, Kơpong 4 Khu lêng gâk kring têa kơxĭ.

Lăm pôu kăn ƀô̆, mâu lêng Khu xiâm pơkuâ lêng Kơpong 4 Khu lêng gâk kring têa kơxĭ, jâ Võ Thị Ánh Xuân, Kăn xiâm phŏ hnê ngăn tơnêi têa tối phiu ro hdrối tơdroăng ki kân rơdêi dêi khu lêng ối tung Kơpong 4 Khu lêng gâk kring têa kơxĭ, ôh tá hnê cheăng lêng hbrâ rơnáu tơplâ, tŏng gum mâu ngế trâm xía vâ mê ối cho tíu hgiên, tơdroăng loi tơngah krá tơniăn ăm kuăn pơlê tơnăng ká xi xŏng lo tung dế têa kơxĭ tơnăng ká.

Ƀă Kơpong 4 Khu lêng gâk kring têa kơxĭ, Kăn xiâm phŏ hnê ngăn tơnêi têa pơkâ thế pêi lĕm tro 3 khu hnoăng cheăng: gâk kring krá tơniăn hnoăng pơkuâ têa kơxĭ, rơlố; tơniăn gâk kring, tơniăn a têa kơxĭ ƀă mơnhông cheăng kâ krá tơniăn.