Klăng leh tơbâ 8/3, a Tíu chôu ‘măn tơmeăm ton nah ‘na kơchuâ um Việt Nam, jâ Võ Thị Ánh Xuân, Kăn xiâm phŏ hnê ngăn tơnêi têa trâm mâ ƀă krếo ôu têa chếi, kâ plâi, kơƀăn mâu vâi kơdrâi pro Kăn teăng mâ, Kăn pơkuâ teăng mâ mâu khu tơrŭm cheăng lâp plâi tơnêi a Việt Nam. Xông tơpui a roh trâm mâ, jâ Võ Thị Ánh Xuân tối rơdêi, Việt Nam đi đo nhuô̆m tơdroăng thăm rak krá tơniăn ƀă thăm mơdêk tơrŭm cheăng tơdâng, tơrŭm, rơtế ai pơxúa ƀă mâu kong têa, mâu khu tơrŭm cheăng lâp plâi tơnêi, tung mê, ai mâu kong têa, mâu khu tơrŭm cheăng lâp plâi tơnêi ki mâu kăn teăng mâ, mâu kăn pơkuâ teăng mâ mâu khu tơrŭm cheăng lâp plâi tơnêi cho kăn teăng mâ.

Roh kố, teăng mâ Tơnêi têa ƀă kuăn pơlê Việt Nam, Kăn xiâm phŏ hnê ngăn tơnêi têa pơtroh rơkong mơnê tá hiâm mơno troh Chin phuh ƀă kuăn pơlê mâu kong têa, mâu khu tơrŭm cheăng lâp plâi tơnêi mot trâu hơngế, păng ‘nâng, châ tơƀrê tung mâu kơvâ cheăng. Teăng mâ mâu kơdrâi pro kăn teăng mâ, Kăn pơkuâ teăng mâ mâu khu tơrŭm cheăng lâp plâi tơnêi a Việt Nam, jâ Samina Naz, Kăn teăng mâ Bangladesh a Việt Nam tối ăm ‘nâi, diâp hnoăng ăm vâi kơdrâi ƀă vâi hdrêng kơdrâi cho hnoăng cheăng tơdjuôm.

Hâi lâp plâi tơnêi vâi kơdrâi cho roh tơ’lêi vâ mâu kong têa hvái ngăn mâu tơkêa kố, xuân môi tiah mâu tơdroăng châ tơƀrê, pơloăng mơnúa troăng prôk la ngiâ.