Kơxo hâi lơ 21/3, a tíu pêi cheăng dêi Kăn xiâm hnê ngăn tơnêi têa, jâ Võ Thị Ánh Xuân, Kăn xiâm phŏ hnê ngăn tơnêi têa trâm mâ mâu kăn khu mơdró kŭn ƀă krâ kơvâ dêi Việt Nam drêng troh hneăng hôp mâu kăn tung lâp tơnêi têa dêi Khu mơdró kŭn ƀă krâ kơvâ Việt Nam rôh má 4, hneăng 2023-2028.

Châ mơjiâng a hơnăm 2005, kơ’nâi lối 17 hơnăm mơjiâng ƀă xông rơdêi, khu Tơrŭm cheăng hiăng mơdêk po rơdâ sap tíu xiâm troh mâu kong pơlê ƀă kơxô̆ mơngế veăng rế tâk hên. Tơbleăng a rôh trâm mâ, jâ Võ Thị Ánh Xuân, Kăn xiâm phŏ hnê ngăn púi vâ khu mơdró pơtối mơ-eăm mơjiâng um méa  mơngế mơdró rơkê tiô vêa vong dêi Việt Nam; mơdêk tuăn hiâm hâk tơngăm dêi hdroâng mơngế, ai hiâm mơno lĕm rơkê ‘na mơdró, pơtối rak hnoăng pro xiâm ƀă pêi tro tiô hnoăng cheăng dêi khu mơdró tiô pơkâ dêi Luât; ai púi vâ mơ-eăm mơnhông pro kro mơdrŏng ăm tơná, ăm tơnêi têa.