Kơxo lơ 16/2, a Hà Nội, jâ Võ Thị Ánh Xuân, Pôu râng hnoăng Kăn xiâm hnê ngăn tơnêi têa veăng leh tơbâ 70 hơnăm Hâi mơjiâng khu lêng Gâk kring (16/2/1953 – 16/2/2023) ƀă tơdah Inâi Ngế khên tơnôu khu lêng kuăn pơlê roh má 3. Xông tơpui a leh tơbâ, teăng mâ Khu râ kăn pơkuâ Đảng, Tơnêi têa, jâ Võ Thị Ánh Xuân kheăn kơdeăn ƀă rơkâu mâu tơdroăng châ tơƀrê, hnoăng ƀlêi trâng ki rơkê ki mâu rơxông kăn ƀô̆, mâu lêng gâk kring Kŏng an kuăn pơlê hiăng mơ-eăm châ tơƀrê tung plâ 70 hơnăm hiăng hluâ.

Jâ Võ Thị Ánh Xuân tối nhên, tung la ngiâ, tơdroăng cheăng lâp plâi tơnêi pơtối ai tơdroăng ki ôh tá ‘nâi tối hdrối ôh. Jâ Võ Thị Ánh Xuân pơkâ thế khu lêng gâk kring kŏng an kuăn pơlê pêi tiô kơtăng tơdroăng pơkuâ kơtăng, tơdrêng rêm tơdroăng dêi Đảng, ối a ko cho pôa Nguyễn Phú Trọng, Kăn xiâm pơkuâ hnê ngăn Đảng; tơdroăng pơkuâ tơkŭm, môi tuăn dêi Tơnêi têa; tơdroăng pơkuâ, hnê mơhno dêi Đảng ủy Kŏng an Tơnêi têa, Khu xiâm pơkuâ Kŏng an ƀă tơdroăng séa ngăn dêi kuăn pơlê ƀă khu lêng gâk kring.