Kơxo lơ 24/2, a tíu pêi cheăng dêi Kăn xiâm hnê ngăn tơnêi têa, jâ Võ Thị Ánh Xuân, râng hnoăng Kăn xiâm hnê ngăn tơnêi têa pơcháu pơkâ rah xo Kăn teăng mâ Kŏng hòa xah hô̆i chuh ngiah Việt Nam a kong têa ê hneăng hơnăm 2023-2026 ai 15 ngế. Tối tơbleăng hnoăng cheăng, teăng mâ kăn xiâm Đảng, Tơnêi têa, Kăn xiâm hnê ngăn tơnêi têa rơkâu 15 ngế Kăn teăng mâ ki châ rah xo mê, loi khât kơ mâu kăn teăng mâ kô pê klêi hnoăng cheăng pơcháu.

Kăn xiâm hnê ngăn tơnêi têa pơkâ thế mâu kăn teăng mâ hnê mơhno mâu kơ koan teăng mâ Việt Nam a kong têa ê pơtối rak vế tơdroăng hmâ pêi pro ton nah ƀă ki lĕm ‘na tơpui kâ dêi pâ pôa, xúa tro tung tơdroăng tơpui kâ ƀă tơdroăng tơpui kâ rơxông Hồ Chí Minh, tơpui rơmuăn, rơkê plĕng, ƀeăn la xuân khên tơnôu, pêi pro kơtăng, tro tiô pơkâ, pêi tro tro tiô hnê mơhno dêi pôa Nguyễn Phú Trọng, Kăn xiâm hnê ngăn Đảng a hneăng hôp tơpui tơno lâp tơnêi têa tơbleăng pêi tiô pơkâ hneăng hôp kân má 13 dêi Đảng; xúa rôh, tơkâ luâ xơpá pơloăng mơnúa vâ pê klêi tơdroăng cheăng pơcháu dêi Đảng, Tơnêi têa ƀă kuăn pơlê loi pơcháu.