A tơring Hàm Thuận Bắc, kong pơlê Bình Thuận, Khu xiâm pơkuâ Đoân Droh rơtăm Kŏng san Hồ Chí Minh nếo tơkŭm po Leh pơxiâm pêi cheăng Khế droh rơtăm hơnăm 2023 ƀă dó inâi ‘’Rơxông ối nếo djâ troăng ahdrối xúa kŏng ngê̆ tung pêi cheăng’’.

Xông tơpui a roh leh, jâ Võ Thị Ánh Xuân, râng hnoăng Kăn xiâm hnê ngăn tơnêi têa tối, xúa kŏng ngê̆ cho hnoăng cheăng ki pá, hên pơloăng mơnúa, pơkâ thế ai tơdroăng pơkuâ, hnê mơhno tơkŭm ing Khu xiâm pơkuâ Đoân Droh rơtăm; tơdroăng ki khŏm mơ-eăm hên, ƀeăn ƀĕng rơkê, tơmiât pêi rơkê dêi mâu khu râ Đoân, tơdroăng ki veăng hên, djâ troăng ahdrối dêi rơxông ối nếo lâp tơnêi têa vâ mơjiâng tơdroăng pêi cheăng trâu hơngế, kum djâ Việt Nam chiâng tơnêi têa pêi cheăng xúa kŏng ngê̆, tơniăn ƀă mơnhông kro mơdrŏng, djâ troăng ahdrối mơnúa mâu kŏng ngê̆ ƀă troăng pêi nếo a hơnăm 2030.

Klêi kơ’nâi leh pơxiâm pêi cheăng hiăng ai hên tơdroăng tơkŭm po môi tiah: Lăm pôu, diâp kơxuô tơmeăm ăm mâu vâi o hok tro, droh rơtăm kŏng nhâ ai tơdroăng rêh ối pá puât, mâu Jâ Nôu Việt Nam khên tơnôu; diâp mâu tơmeăm pêi rơkê, tơdroăng cheăng ki kơnâ. Tâi ki kơnâ mâu kơxuô tơmeăm, mâu tơmeăm diâp ăm a kong pơlê Bình Thuận tung leh pêi cheăng Khế Droh rơtăm cho vâ chê 15 rơtal liăn.