Hneăng hdrối kố nah, Vi ƀan Măt trâ̆n tơnêi têa Việt Nam rêm râ tung kong pơlê hiăng mơhnhôk Kuăn pơlê tơ’noăng hriâm, pêi cheăng hriĕn plĕng tơdroăng ki nếo, pêi tơƀrê mâu pơkâ mơnhông cheăng kâ-rêh ối, túa lĕm tro, rêh ối pơlê pơla; kơhnâ veăng séa ngăn ƀă veăng pêi tơdroăng krê, tơdroăng khu râ pơlê pơla; hbrâ mơdât kâ kơluâ, mơdât mơ’nhiê tơmeăm liăn ngân, veăng mơnhông Đảng, mâu kăn pêi cheăng tơdrăng lĕm rơdêi.

5 hơnăm hdrối Liăn ‘măn kơdĭng “Xua mâu ngế kơtiê” rêm râ dêi kong pơlê hiăng veăng tơlo vâ chê 59 rơtal liăn, veăng gum pro nếo ƀă ‘mâi rơnêu lối 1.000 toăng hngêi tơrŭm tuăn, diâp 35.800 kơxu tơmeăm  tung rôh leh, têt, kơjo gum lối 270 rơpŏng kơtiê, vâ chê kơtiê mơnhông cheăng kâ. Hneăng hôp tơpui tơno rah 91 ngế cheăng tung Vi ƀan Măt trâ̆n Tơnêi têa Việt Nam kong pơlê hneăng ki nếo. Jâ Y Bích Thọ châ hneăng hôp ra xo pro kăn hnê ngăn Vi ƀan Măt trâ̆n tơnêi têa Việt Nam kong pơlê Kon Tum hneăng 11.