Drêng pôa Võ Văn Thưởng châ Kuô̆k hô̆i hneăng 15 pôk pro kăn xiâm hnê ngăn tơnêi têa Kŏng hòa xah hô̆i chuh ngiah Việt Nam, kăn pơkuâ mâu kong têa ƀă mâu khu tơrŭm lâp plâi tơnêi: Brunei Darussalam, Singapore, Hàn Quốc, Australia, Belarus, Bangladesh, Luxembourg, Nicaragua, ASEAN ƀă Khu tơrŭm ngăn chiâk deăng - kế kâ Khu lâp kong têa hiăng tơpui phôn ƀă pơtroh kơthô rơkâu.

Tung kơthô rơkâu, pơtáu kong têa Brunei Darussalam Haji Hassanal Bolkiah tối nhên tơdroăng ki rơhêng vâ tơrŭm krá tơniăn ƀă pôa Võ Văn Thưởng, Kăn xiâm hnê ngăn tơnêi têa tung la ngiâ vâ pro trâu rơdâ tâ nếo tơrŭm cheăng ki kơnía git pơla péa tơnêi têa tá mâu tơdroăng ki tơrŭm pơla péa pâ xuân môi tiah ƀă tơdroăng ki cho kong têa tơrŭm cheăng a chê tung ASEAN.

Tung kơthô rơkâu, Kăn xiâm pơkuâ Kŏng hòa Singapore jâ Halimah Yacob prếi pôa Lý Hiển Long, Ngế pro xiâm hnê ngăn kong têa loi tơngah péa tơnêi têa kô pơtối tơrŭm cheăng ó rơdêi tâ tung mâu kơvâ cheăng nếo môi tiah on tơhrik ki vêh ‘mâi pro ƀă tơdroăng ‘na carbon; tối rơhêng vâ tơrŭm cheăng krá tơniăn ƀă pôa Võ Văn Thưởng, Kăn xiâm hnê ngăn tơnêi têa cho vâ mơdêk tơrŭm tâ nếo ‘na tơrŭm cheăng ki péa pâ pơrá ai pơxúa.