Hâi lơ 24/2, pôa Phan Đình Trạc, Ngế cheăng tung Khu xiâm kal kí, Kăn pơkuâ ngăn ‘na tơdroăng cheăng xiâm dêi Đảng hiăng ai mâ ƀă hnê mơhno a Hneăng hôp mơgêi 10 hơnăm pêi pro tiô pơkâ dêi Đảng má 8, Hneăng 11 ‘na “Hnoăng cheăng kring vế Tơnêi têa tung chal nếo” a kong pơlê Cao Bằng. A Hneăng hôp mê, pôa Phan Đình Trạc, Ngế cheăng tung Khu xiâm kal kí, Kăn pơkuâ ngăn cheăng Đảng tơnêi têa hiăng kơdeăn khĕn mâu tơdroăng ki hiăng tơƀrê ki Cao Bằng pơkâ pêi pro tiô tơdroăng pơkâ dêi Hneăng hôp kân Đảng má 8, hneăng 11 tung pơla hdrối kố nah; tơdrêng amê, pơkâ thế Cao Bằng pơtối hnê mơhno, mơdêk hiâm tuăn pôu râng hnoăng cheăng, mơjiâng tơdroăng ki môi tuăn tung hlê plĕng, arak ƀă pêi pro dêi kăn ƀô, đảng viên, mâu kăn pơkuâ cheăng, mơngế cheăng, kuăn pơlê, kăn ƀô̆ lêng, kŏng ang ‘na hnoăng cheăng kring vế, rak ngăn tơniăn Tơnêi têa tung chal nếo.

Pôa Phan Đình Trạc tối nhên: ‘Nâi nhên hnoăng cheăng kring vế Tơnêi têa cho hnoăng cheăng ki xiâm, đi đo dêi tâi tâng Đảng, tâi tâng kuăn pơlê, tâi tâng khu lêng, Cao Bằng kal athế tơrŭm cheăng krá khâp tung pơla mơnhông pêi cheăng kâ-rêh ối pơlê pơla, tơrŭm tơpui kâ ƀă kong têa ê vâ kring vế tơniăn ăm pơlê pơla, tơnêi têa.