Kơxo lơ 16/2, a tíu pêi cheăng xiâm Đảng, Kăn xiâm Đảng, Tơnêi têa tơkŭm po trâm mâ mâu ngế rơkê, mâu cheăng khoa hok, văn ngê̆ sih rơnó hơngui Qúy mão 2023. Tơbleăng a roh trâm mâ, pôa Võ Văn Thưởng, Ngế cheăng tung tíu xiâm kăn kí, kăn hnê ngăn Đảng tối, rôh trâm mâ mơhno tơmâng khât dêi Đảng, Tơnêi têa ƀă tơdroăng cheăng khoa hok ƀă kŏng ngê̆, hnê hriâm ƀă hnê mơjiâng tuăn ngôa rơkê, túa lĕm tro, hơdruê xuâng, tơmâng, ô eăng, pleăng hnoăng cheăng dêi mâu ngế rơkê, khu cheăng khoa hok, văn ngê̆ sih tung tơdroăng mơjiâng ƀă kring vế tơnêi têa.

Klêi mê, hlối pơtối mơhnhôk tơrŭm, môi tuăn dêi rơpó tung tơmiât, pêi pro dêi khu ki rơkê, khu cheăng khoa hok, văn ngê̆ sih tung tơnêi têa ƀă kong têa ê ƀă tơdroăng mơjiâng, mơnhông ‘na khoa hok, kŏng ngĕ, hnê hriâm, hnê mơjâng tuăn ngôa rơkê, ngê̆ thuât dêi tơnêi têa, veăng pê klêi tơdroăng Pơkâ hneăng Hôp kân tung lâp tơnêi têa rôh má 13 dêi Đảng.