Pôa Vương Đình Huệ, kăn xiâm hnê ngăn Kuô̆k hô̆i pơkâ thế kong pơlê Tuyên Quang tơkŭm mơnhên tối tơdế hneăng, séa ngăn tâi tâng mâu kơvâ cheăng, vêh séa ngăn mâu tơdroăng pơkâ xiâm ‘na hnoăng cheăng, tơdroăng tơkêa ki tá hâi tơbleăng lơ tá hâi pêi klêi vâ pơkâ pêi pro. Malối, Tuyên Quang kal tơkŭm pêi pro tro túa pơkâ kong pơlê tơtro ƀă Túa pơkâ Tâi tâng tơnêi têa ki Kuô̆k hô̆i nếo pơkâ a Hneăng hôp ôh tá tối hdrối rôh má péa pơla hdrối kố nah, túa pơkâ ‘na tơnêi tơníu, túa pơkâ ‘na kơphô̆, túa pơkâ kơpong kong pơlê; pêi klêi tơdroăng pơkâ hngêi trăng, troăng klông, tơtrŏng mơjiâng mâu tíu trâm ƀă troăng tơkŭm; tơmiât nhên vâ tí tăng tơnêi mơnhông kơpong cheăng ƀă kơmăi kơmok, kơpong kơphô̆.

Kơxê rơtế tung hâi, pôa Vương Đình Huệ, Kăn xiâm hnê ngăn Kuô̆k hô̆i ƀă khu kăn pêi dêi hnoăng cheăng hiăng troh pôu Kơpong tíu xối tơbâ Tơnêi têa Tân Trào, chôu nhang a Lán Nà Nưa, chôu nhang ƀă pêt loăng chôu vế a Hngêi Tân Trào ƀă hên ki ê hía.