Kơxo lơ 10/2, a Hngêi Kuô̆k hô̆i, pôa Vương Đình Huệ, kăn xiâm hnê ngăn Kuô̆k hô̆i pơkuâ po rôh pêi cheăng ‘na hnoăng cheăng hbrâ po Rôh hôp Khu kăn Kuô̆k hô̆i hơnăm ối nếo lâp plâi tơnêi rôh má 9 xua Kuô̆k hô̆i Việt Nam tơkŭm po. Tơpui a rôh pêi cheăng, pôa Vương Đình Huệ, Kăn xiâm hnê ngăn Kuô̆k hô̆i pơkâ thế Vi ƀan Tơpui kâ pơtối tơmâng xo mâu rơkong tơpui tối, vâ rĕng pêi pro klêi mâu hlá mơ-éa ki ai tơdjâk troh vâ hbrâ tro má môi ăm tơdroăng ki tơkŭm po Rôh hôp; môi tuăn tiô tối hdrối kô tơkŭm po Rôh hôp kố a khế 9 hơnăm kố.

Kăn xiâm hnê ngăn Kuô̆k hô̆i tối nhên, ki xiâm dêi Rôh hôp Khu kăn Kuô̆k hô̆i hơnăm ối nếo lâp plâi tơnêi cho mơdêk hnoăng cheăng dêi Kuô̆k hô̆i hơnăm ối nếo ƀă tơdroăng ki veăng dêi droh rơtăm tung tơdroăng cheăng Kuô̆k hô̆i, mơ’no tối mâu tơdroăng pâ thế, tung tơdroăng ki ngăn dêi hơnăm ối nếo ‘na mâu tơdroăng cheăng xuân môi tiah tơdroăng ki kal dêi IPU; mơjiâng troăng tơrŭm ƀă mơdêk ivá, po rơdâ túa ki châ pơxúa dêi hơnăm ối nếo ƀă tâi tâng mâu tơdroăng ki rơtế vâ ‘nâi plĕng.