Kơxo lơ 17/2, a Hngêi hôp Kuô̆k hô̆i, pôa Vương Đình Huệ, kăn xiâm hnê ngăn Kuô̆k hô̆i hiăng pơkuâ po rôh hôp vâ tơmâng ƀă ă rơkong veăng tơpui tối ƀă mâu tơdroăng ki kân, mâu tơdroăng ki ối ai rơkong tơpui tối ki phá ra phá dêi rơpó ƀă kơxop hlá mơ-éa Luât khu pêi cheăng tơrŭm ki ‘mâi pơ’lêh. Tơpui a rôh hôp, pôa Vương Đình Huệ, kăn xiâm hnê ngăn Kuô̆k hô̆i môi hdroh nếo tối nhên, kố cho túa pêi thâ rĕng, sap ing hngế, hdrối vâ pơtroh ăm Vi ƀan pơkuâ Kuô̆k hô̆i ăm rơkong veăng tơpui tối păng ‘nâng rôh má mơ’nui.\

Klêi mê, Kơxop hlá mơéa Luât Khu pêi cheăng tơrŭm ki ‘mâi pơ’lêh kô châ pâ thế a Rôh hôp khu kăn Kuô̆k hô̆i ki hmâ. Tiô pơkâ, Kuô̆k hô̆i séa ngăn vâ têk kŏng tơbleăng a hneăng hôp má pơtăm a khế 5 hơnăm kố. Mơgêi rôh pêi cheăng, pôa Vương Đình Huệ, kăn xiâm hnê ngăn Kuô̆k hô̆i pơkâ thế Vi ƀan cheăng kâ môi tuăn rơtế ƀă Khu xiâm pơkâ ƀă ‘no liăn cheăng, mâu kơ koan, khu tơrŭm cheăng vâ môi tuăn túa pơkâ pơtroh ăm Vi ƀan pơkuâ Kuô̆k hô̆i, Kuô̆k hô̆i; pơkâ thế Ngế pro xiâm phŏ hnê ngăn Chin phuh - pôa Trần Lưu Quang tơkŭm pâ rơkong tơpui tối ăm Chin phuh va rĕng môi tuăn mâu tơdroăng ki kân châ tối a rôh pêi cheăng.