Xông tơpui a roh pêi cheăng ƀă mâu tíu cheăng klêi kơ’nâi séa ngăn tơnêi tơníu ki ai, pôa Trần Thanh Mẫn - Kăn xiâm hnê ngăn Kuô̆k hô̆i tối nhên, Tơraih tơƀai lâp plâi tơnêi Long Thành cho tơdroăng tơkêa bro ki kal khât, châ Khu râ kăn pơkuâ Đảng, Tơnêi têa tơmâng păng ‘nâng. 

Kố cho tơdroăng tơkêa bro kơnâ ton xŏn ƀă mơnhông cheăng kâ – rêh ối pơlê pơla, gâk kring tơnêi têa dêi kong pơlê Đồng Nai, Kơpong cheăng kâ ki kal peăng Hdroh ƀă dêi tơnêi têa, tiô tối hdrối djâ ăm dâng 200.000 tơdroăng cheăng pêi. Tơraih tơƀai lâp plâi tơnêi Long Thành châ pói tơngah chiâng môi tung mâu tíu xiâm pơto tơmeăm troăng tơƀai tiô rơxông nếo a kơpong.

‘Na tơdroăng mơjiâng Tơraih tơƀai lâp plâi tơnêi Long Thành, troh nôkố, hiăng pêi kêi đeăng tơdroăng séa ngăn ƀom mìn, gu tơbăng tơnêi, mơjiâng kơnâng; dế pêi pro mơjiâng pro hngêi tơkôm to tơƀai, troăng tơƀai hdrâp chu, Troăng kơxô̆ 1 tơdjêp ƀă Troăng kân tơnêi têa 51 ƀă 03 tơmeăm ki mơjiâng pro xiâm. Mâu tơmeăm pơrá hiăng châ hluâ tâng pơchông ƀă tơdroăng tơkêa môi tuăn pơla péa pâ.