Kơxo lơ 13/3, a Hngêi Kuô̆k hô̆i, pôa Vương Đình Huệ, Kăn xiâm hnê ngăn Kuô̆k hô̆i tơdah Ngế pơkuâ mâu Kơ koan teăng mâ Việt Nam a kong têa ê hneăng hơnăm 2023- 2026. Tơbleăng a rôh trâm mâ, Kăn xiâm hnê ngăn Kuô̆k hô̆i pơkâ thế Ngế xiâm Kơ koan teăng mâ Việt Nam a kong têa ê kal mơdêk tâ nếo tơdroăng tơrŭm pơla Kuô̆k hô̆i pin ƀă kơ koan mơjiâng luât kong têa ki pin ối vâ mơjiâng tơrŭm krá tơniăn ƀă mâu kăn Kuô̆k hô̆i a tơnêi têa ki tơná ối.

A rôh tơdah, pôa Vương Đình Huệ tối nhên, tơpui tơno ‘no hnoăng veăng ‘no pêi vâ tơnêi têa châ mơnhông, hnoăng cheăng pêi, loi nhoăm ƀă ki rơdêi tung lâp plâi tơnêi môi tiah dế nốkố. Klêi mê nếo, ki rơdêi, hnoăng cheăng pêi, ki nhoăm loi dêi tơnêi têa nôkố xuân pro hlâu ăm tá ki rơdêi ƀă ivá, pro tơ‘lêi hlâu ‘na tơdroăng cheăng tơpui kâ. Mâu ngế cheăng tơpui kâ dêi mâu kong têa malối cho Việt Nam pin cho ivá rơdêi tâi tâng.

Kăn xiâm hnê ngăn Kuô̆k hô̆i pơkâ thế, Ngế pơkuâ mâu kơ koan teăng mâ dêi Việt Nam a kong têa ê veăng ‘no hnoăng pêi kơhnâ khât a tơdroăng kring vế tơniăn, hnoăng pơkuâ, tơrŭm môi tuăn, rak tơniăn tung kong têa dêi tơnêi têa, kring vế tơniăn tơnêi têa “Ing apoăng, ing hơngế’’, kring vế ki tơniăn ƀă ki hơniâp lĕm dêi kuăn pơlê. Kố cho hnoăng cheăng pêi đi đo, ton ta ah, kal thế chôu pâ ƀă  mơ-eăm pêi pro, pêi krá rơdêi.