Kơxê lơ 23/3, pôa Vương Đình Huệ, kăn xiâm hnê ngăn Kuô̆k hô̆i tơdah Khu kăn pơkuâ khu mơdró kâ xiâm dêi Hô̆i đong tê mơdró Mih – ASEAN. Kăn xiâm hnê ngăn Kuô̆k hô̆i tối nhên, Kuô̆k hô̆i Việt Nam tơhrâ pro tơdroăng luât tơniăn, tơdrăng, tơ’lêi hlâu vâ mâu khu mdró kâ kong têa ê, tung mê ai mâu khu mơdró kâ Mih, pơtối pêi cheăng, po rơdâ túa pơkâ ƀă mơnhông ton xŏn a Việt Nam.

Kuô̆k hô̆i ƀă Chin phuh đi đo hbrâ rơnáu tơmâng mâu rơkong tơpui tối, tơmâng ngăn troh mâu tơdroăng cheăng ki loi tơngah dêi mâu khu mơdró kâ ‘na troăng hơlâ, luât dêi Việt Nam. Pôa Vương Đình Huệ, Kăn xiâm hnê ngăn Kuô̆k hô̆i pơkâ thế mâu khu mơdró kâ pơtối rơtế prôk ƀă Việt Nam ing mâu tơdroăng ki po rơda tâ nếo tơdroăng cheăng tê mơdró ‘no liăn cheăng. Rơtế prôk, tŏng kum khu mơdró kâ Việt Nam mơdêk ki rơkê, châ xúa kơmăi kơmok ki rơkê plĕng. Pơtối tơrŭm krá tơniăn ƀă Việt Nam vâ mơdêk ‘no liăn cheăng tung mâu kơvâ cheăng ki Việt Nam châ kơjo kum ƀă Mih ai tơdroăng ki rơdêi.