A hâi tơbâ, pôa Trần Thanh Mẫn - Kăn xiâm hnê ngăn Kuô̆k hô̆i pơkâ thế, Pơlê kong kân Hà Nội tơkŭm hnê tơbleăng Pơkâ hneăng hôp pơlê kong kân hdrối kố nah; chôa lâng tơleăng mơnhên klêi 4 tơdroăng ‘na mơdât pro hâ ho troăng prôk; tơniăn kơphô̆, drêh ngiât, krúa lĕm, rơkê plĕng; ôh tá pro ‘mêi hyôh kong prâi, pro ‘mêi têa, tơnêi tíu tâ tá ƀă têa lân lu a kơphô̆ ƀă kơpong kĭng kơphô̆.

Kăn xiâm hnê ngăn Kuô̆k hô̆i tối pơchân Pơlê kong kân Hà Nội tơkŭm pêi pro tơƀrê tâ nếo tơdroăng mơhnhôk “Tâi tâng kuăn pơlê tơrŭm môi tuăn mơjiâng thôn pơlê nếo, kơphô̆ rơkê plĕng”, pơtối pêi pro hnoăng rak ngăn dêi kuăn pơlê, mơjiâng pơlê “eăng, ngiêt, krúa, lĕm, tơniăn”, rơtế tơrŭm krá ƀă troăng hơlâ “tâi tâng kuăn pơlê kring vế tơniăn Tơnêi têa”... mơ-eăm pôi tá ai mâu ki ‘mêi tong tơmeăm, pro pơlăm pơlôi, ôh tá xúa tê rôe hât điê̆n tưh, ôh tá pâk chik ma tŭi, ôh ta pro xôi luât.