Kơmăng lơ 3/2, a Hngêi hơdruê Kân, pơlê kong kân Hà Nội hiăng tơkŭm po Leh diâp pri Hlá tơbeăng lâp tơnêi têa ‘na mơjiâng Đảng dó inâi Búa liềm vàng roh má VII. Xông tơpui a leh diâp pri, pôa Vương Đình Huệ, Kăn xiâm hnê ngăn Kuô̆k hô̆i tối rơdêi, mâu tơdroăng veăng tơ’noăng ƀă châ kâ pri cho tơdroăng ki mơ-eăm tâi hiâm mơno, tuăn hiâm pôu râng hnoăng cheăng, hiâm mơno hâk vâ tơdroăng cheăng, tơdroăng tuăn pâ tơnêi têa, hdroâng mơngế, tơdroăng loi tơngah ƀă tơdroăng tuăn pâ tá hiâm mơno dêi mơngế chêh hlá tơbeăng ƀă Đảng.

Tung la ngiâ, vâ pêi pro châ tơƀrê Pơkâ Hneăng hôp roh má 13 dêi Đảng, Kăn xiâm hnê ngăn Kuô̆k hô̆i tối, kal pơtối thăm pêi pro rơdêi tơdroăng mơjiâng, rak pro tơniăn lĕm Đảng ƀă khu cheăng kal kí ƀă hiâm mơno thăm pêi pro châ tơƀrê, kơtăng, dâi lĕm ƀă châ tơƀrê tâ nếo; pơkâ thế tâi tâng khu cheăng kal kí, mâu khu râ, mâu kơvâ cheăng, mâu râ kuăn pơlê, tung mê khu chêh hlá tơbeăng pơtối mot chêh hbrâ xêh rơkê tâ kơ mê nếo, kơtăng tâ mê nếo, tơmiât pêi rơkê tâ mê nếo ƀă châ tơƀrê tâ mê nếo.

Khu chêh hlá tơbeăng lâp tơnêi têa ‘na mơjiâng Đảng dó inâi Búa liềm vàng roh má VII ai 2.031 ƀai veăng tơ’noăng, tung mê ai 74 ƀai ki dâi lĕm, rơkê má môi châ diâp pri, ai 6 Pri A; 12 pri B; 18 pri C; 30 pri mơhnhôk ƀă 8 pri chêh tơdroăng hriăn plĕng vâ ăm ƀai ki chêh rơkê má môi.