Kơxê lơ 14/12, a Hngêi Kuô̆k hô̆i hiăng tơkŭm po Leh kĭ tơkêa pơkâ tơrŭm pêi cheăng pơla Đảng khu râ kăn pơkuâ Kuô̆k hô̆i ƀă Khu xiâm pơkuâ tơdroăng cheăng Tơnêi têa. Veăng leh kĭ ai pôa Vương Đình Huệ, Đảng khu râ kăn pơkuâ Kuô̆k hô̆i, Kăn xiâm hnê ngăn Kuô̆k hô̆i; pôa Phan Đình Trạc, Kăn cheăng tung Khu xiâm kal kí, Kăn xiâm pơkuâ hnê ngăn cheăng Đảng, Kăn xiâm pơkuâ tơdroăng tơnêi têa.

Xông tơpui a leh kĭ, pôa Vương Đình Huệ tối, tung pơla kố nah, tơdroăng pêi cheăng tơrŭm pơla Đảng khu râ kăn pơkuâ hnê ngăn Kuô̆k hô̆i  ƀă Khu xiâm pơkuâ tơdroăng Tơnêi têa đi đo châ tơmâng, thăm kơtăng, thăm rơdêi, kum kal khât tung tơdroăng tơbleăng tơdroăng cheăng dêi péa kơ koan kum Khu xiâm pơkuâ tơnêi têa tơdrêng, đi đo cho Khu xiâm kal kí, Khu xiâm pơkuâ hnê ngăn cheăng Đảng, Khu xiâm hnê mơhno ‘na hbrâ, mơdât kâ kơhveăm liăn ngân, ki ôh tá lĕm tro.

Khu xiâm hnê mơhno ‘mâi rơnêu luât Tơnêi têa ‘na mâu kơvâ tơdroăng xiâm, hbrâ, mơdât kâ kơhveăm liăn ngân, tơdroăng ki ôh tá lĕm tro ƀă ‘mâi rơnêu luât. Mâu tơdroăng châ tơƀrê tung tơdroăng tơplâ, mơdât kâ kơhveăm liăn ngân, tơdroăng ki ôh tá lĕm tro, tơdroăng ki xiâm ƀă ‘mâi rơnêu luât ai veăng hên dêi péa kơ koan.