Kơxê lơ 22/3, a Hngêi Kuô̆k hô̆i, Khu râ kăn pêi cheăng teăng mâ dêi Vi ƀan pơkuâ Kuô̆k hô̆i hiăng tơkŭm po Leh tơbâ 20 hơnăm hâi mơjiâng ƀă tơdah Mê dái pêi cheăng ối má péa. Pôa Vương Đình Huệ, Kăn xiâm hnê ngăn Kuô̆k hô̆i veăng hneăng hôp. Hdrối pơkâ pơtối pơ’lêh nếo tơdroăng pêi cheăng dêi Kuô̆k hô̆i, pôa Trần Thanh Mẫn, Kăn xiâm phŏ hnê mơhno má môi Kuô̆k hô̆i pơkâ thế Khu râ kăn pêi cheăng kăn teăng mâ 5 tơdroăng ki xiâm.

Tung mê, tơkŭm hriăn plĕng mâu tơdroăng nếo, ki kal vâ hbrâ tơbleăng, rĕng châ hlo mâu tơdroăng ki nếo, teăm tơdrêng pơkâ ƀă Đảng đoân Kuô̆k hô̆i, Vi ƀan pơkuâ Kuô̆k hô̆i tung tơdroăng pêi kêi đeăng tâi tâng tung khu tơrŭm, khu râ kăn pơkuâ, mâu ngế pêi cheăng dêi Kuô̆k hô̆i, pơtối mơhno hnoăng tíu xiâm dêi kăn teăng mâ Kuô̆k hô̆i tung tơdroăng pêi cheăng dêi Kuô̆k hô̆i. Teăng mâ khu râ kăn pơkuâ Đảng, tơnêi têa, pôa Vương Đình Huệ diâp Mê dái pêi cheăng ối má péa ăm Khu râ kăn pêi cheăng kăn teăng mâ.