Drêng troh leh tơbâ pôa Võ Văn Thưởng châ rah xo pro Kăn xiâm hnê ngăn tơnêi têa, Kăn xiâm hnê ngăn mâu kong têa Kŏng hòa Yân chuh Nhân yân Lếo, Kŏng hòa Nhân yân Trung Hoa, kong têa Kul, kong têa Cuba hiăng krếo phôn ƀă pơtroh kơthô  rơkâu. Tung kơthô ai chêh, Kăn xiâm hnê ngăn Đảng, Kăn xiâm hnê ngăn tơnêi têa Lếo cho pôa Thongloun Sisoulith tối nhên, tơdroăng pôa Võ Văn Thưởng châ rah xo pro kăn xiâm hnê ngăn tơnêi têa mơhno ki loi khât dêi Đảng, Tơnêi têa ƀă Kuăn pơlê Việt Nam ƀă pôa; Lếo kô vâ tơrŭm vâ veăng ‘no hnoăng ‘mâi mơnhông tơrŭm cheăng kân rơdâ, tơrŭm môi tuăn malối, tơrŭm cheăng tung tŭm tơdroăng, pôa ƀă mâu nhŏng o péa Đảng, péa tơnêi têa ƀă kuăn pơlê péa tơnêi têa.

Kơthô dêi Kăn xiâm hnê ngăn tơnêi têa Kŏng hòa Nhân yân Trung Hoa - pôa Tập Cận Bình tối nhên Sinuâ ƀă Việt Nam cho péa tơnêi têa ki achê dêi rơpó tơrŭm dêi rơpó tiô troăng xah hô̆i chuh ngiah.

Pôa Tập Cận Bình tối ngăn nhoăm khât tơrŭm cheăng pơla Sinuâ - Việt Nam, hbrâ vâ mơ-eăm rơtế ƀă pôa Võ Văn Thưởng, Kăn xiâm hnê ngăn tơnêi têa mơdêk tơrŭm cheăng pơla péa tơnêi têa pơtối mơnhông mơdêk tơniăn, rơdêi.