Xông tơpui a chôu phut trâm mâ, pôa Nguyễn Xuân Phúc, Kăn xiâm hnê ngăn tơnêi têa ai mơnhên tối, tung pơla môi hơnăm tơdế mơjiâng tơdroăng tơkêa kố, Khu hnê mơhno ƀă Tôh ki rah chêh mâu tơdroăng kal mơjiâng tơdroăng tơkêa pêi kố hiăng kơdo mơ-eăm pêi pro klêi hnoăng cheăng ƀă pêi pro klêi tơdroăng cheăng ki kân. Ki xiâm cho hiăng hnê mơhnhôk mâu khu râ xiâm tơnêi têa mơjiâng tơdroăng pơkâ kơxô̆ 27 ‘na tơdroăng ki vâ pro mơgêi; tơkŭm po 3 hneăng hôp dêi tơnêi têa, 15 tơdroăng hôp, tơpui tơno trâu rơdâ ƀă 3 tơdroăng hôp tơmâng xo rơkong veăng hnê tối, tơpui khĕn dêi mâu khu pơkuâ hnê ngăn Đảng kong pơlê, pơlê kong kân; mơhnhôk tơdroăng veăng tơmâng ngăn, rak vế kân rơdâ dêi mâu ngế ki hriăn plĕng, mâu ngế cheăng ‘na khoa hok, kăn ƀô̆ pêi cheăng ki păng ‘nâng ‘na tơdroăng kal kí, mâu tíu xiâm hriăn plĕng, mâu hngêi trung đăi hok tung lâp tơnêi têa.

Kăn xiâm hnê ngăn tơnêi têa vêh mơnhên, Tơdroăng pơkâ ‘na “Pơtối mơjiâng ƀă pêi pro klêi Luât xiâm tơnêi têa xah hô̆i chuh ngiah Việt Nam tung chal nếo” cho tơmeăm khoăng ki kal dêi hiâm tuăn, ngôa mơno rơkê tơchoâm ƀă tơdroăng ki pleăng dêi hnoăng cheăng mâu ngế ki hriăn rơkê tung Tôh rah chêh tối tơdroăng. Kăn xiâm hnê ngăn tơnêi têa pơkâ thế kal athế thăm mơdêk hnê mơhno tối, ai troăng hơlâ pơkâ mâu tơdroăng cheăng drêng rak vế, pêi pro tiô mâu tơdroăng pơkâ a hneăng hôp lâp tơnêi têa tung hriăn plĕng, hriâm tâp, hnê mơhno djâ troăng tiô tơdroăng pơkâ dêi hneăng hôp má 6 hneăng 13.