Kơxê lơ 19/12, a Hà Nội Khu lêng pĕng răng on - lêng tơƀai po lêh kân krip  tơkŭm trâm mâ drêng troh leh tơbâ 50 hơnăm Plâ ƀlêi trâng “Hà Nội - Điện Biên Phủ a rơvâ plêng’’ ƀă hlối tơdah Kăn xiâm hnê ngăn tơnêi têa lăm pôu, pêi cheăng a Khu lêng drêng troh leh tơbâ 78 hơnăm hâi mơjiâng Khu lêng Việt Nam ƀă 33 hơnăm Hâi leh Khu lêng kring gak tơkăng kong dêi tâi tâng mâu lêng ƀă kuăn pơlê.

Tối tơbleăng a rôh trâm mâ, pôa Nguyễn Xuân Phúc tối nhên, plâ ƀlêi trâng “Hà Nôị - Điện Biên Phủ a rơvâ plêng’’  mơhno troăng xiâm kal kí,  mâu lêng ki tro dêi Đảng pin, cho plâ ƀlêi trâng dêi ivá rơdêi kal kí, hiâm tuăn khên tơnôu mơ-eăm dêi tâng tâi hdroâng mơngế Việt Nam; ai tuăn mơ-eăm khên nôu, ‘nâi tơplâ ƀă khŏm kơnhêng plâ xâ Mih ki tơbriêt pơkuâ dêi tơnêi têa.

Ing tơdroăng plâ ƀlêi trâng kố, pôa Nguyễn Xuân Phúc ai tối tiah kố, hên ƀai hriâm kal thế xúa tung tơdroăng hriăn plĕng, mơjiâng ƀă kring vế Tơnêi têa nôkố. Khĕn kơdeăn mâu hnoăng hiăng pêi tơƀrê dêi Khu lêng pĕng răng on - lêng tơƀai vâ châ 60 hơnăm hdrối, Kăn xiâm hnê ngăn tơnêi têa xuân tối mâu tơdroăng pơloăng mơnúa tung hneăng mơjiâng ƀă kring vế Tơnêi têa nôkố, pakĭng mê, pơkâ thế mâu lêng pơtối rak vế tơdroăng pêi pro khên tơnôu, tơmâng mơjiâng khu lêng rơdêi tá kuăn mơngế ƀă mâu pháu hơhnêa, hbrâ tơmeăm, xo tơdroăng hnê kuăn mơngế cho tơdroăng ki xiâm - tăng mâu ngế rơkê pơkâ pêi châ tơƀrê mâu tơdroăng cheăng  kring vế Tơnêi têa.