Hdrối lăm pôu kong têa Hàn Quốc, pôa Nguyễn Xuân Phúc, Kăn xiâm hnê ngăn tơnêi têa hiăng trâm mâ mâu khu tơrŭm cheăng mơngế Hàn Quốc ki dế rêh ối ƀă pêi cheăng a Việt Nam. Tối tơbleăng a rôh trâm mâ, Kăn teăng mâ Hàn Quốc a Việt Nam ăm ‘nâi pôa Nguyễn Xuân Phúc cho ngế ki châ krếo dêi râ kăn xiâm Tơnêi têa ki apoăng dêi Kăn xiâm pơkuâ kong têa cho pôa Yoon Seuk-yeol ing mê, kô hlo Hàn Quốc nhoăm tơdroăng tơrŭm cheăng ƀă Việt Nam. Peăng Hàn Quốc tơngah hneăng lăm pôu dêi Kăn xiâm hnê ngăn tơnêi têa kô po troăng tơrŭm tung hên kơvâ cheăng pơla péa tơnêi têa, malối cho mơjiâng tơdroăng tơrŭm cheăng ‘na rôe tơmeăm khoăng tung kơdâm tơnêi ƀă kĭ tơhrâ tung mâu hlá mơ-éa tung mâu tơdroăng ki ê.

Pôa Nguyễn Xuân Phúc, Kăn xiâm hnê ngăn tơnêi têa ăm ‘nâi, hneăng trâm mâ mê kố mơdêk tơrŭm tiah hmâ, hlê plĕng dêi rơpó, cho rôh vâ Kăn xiâm hnê ngăn tơnêi têa xuân môi tiah Kăn pơkuâ mâu kơ koan Việt Nam hlê plĕng tâ tơdroăng púi vâ, tơngah dêi kuăn pơlê mơngế Hàn Quốc.