Kơxê hâi lơ 16/12, pôa Đỗ Văn Chiến, Kăn xiâm hnê ngăn Vi ƀan Măt trâ̆n tơnêi têa Việt Nam rơtế ƀă mâu ki pêi cheăng lăm pôu, rơkâu hâi tĭng kân Pâ Xeăng chu chiâng kuăn mơngế hơnăm 2022 a Hngêi hnê mơjiâng mâu bok xối, jâ chĭng a Xuân Lộc, pơlê kong kơdrâm Long Khánh, kong pơlê Đồng Nai. Teăng mâ Đảng, Tơnêi têa, Măt trâ̆n tơnêi têa Việt Nam, pôa Đỗ Văn Chiến pơtroh rơkong rơkâu kơ ƀok xối kân Đỗ Văn Ngân, Ngế ki pơkuâ a hngêi khôp xiâm ngăn mâu ƀok xối, ƀok muăn, jâ chĭng, mâu kuăn pơlê ki tiô khôp drêng troh hâi tĭng kân pâ Xeăng chu chiâng kuăn mơngế.

Pôa Đỗ Văn Chiến púi vâ, Ƀok xối kân Đỗ Văn Ngân, ngế pơkuâ hngêi khôp xiâm rơtế ƀă mâu ƀok xối, ƀok moan, jâ chĭng hnê kuăn pơlê ki tiô khôp tung kơpong hngêi khôp Xuân Lộc pơtối mơnhông mơdêk tuăn loi hâk tơngăm dêi hdroâng mơngế, tiô troăng pơkâ “Nhoăm kơ Pâ xeăng kâ dêi tơnêi têa”, veăng ‘no hnoăng mơjiâng tơnêi têa rế ton tế mơnhông mơdêk, rêm ngế kuăn pơlê ai tơdroăng rêh ối phâi tơtô, tơniăn lĕm.

Teăng mâ ƀok pơkuâ xiâm Hngêi khôp Xuân Lộc, Ƀok xối kân Đỗ Văn Ngân tối mơnê kơ kăn xiâm Đảng, Tơnêi têa ƀă kăn xiâm hnê ngăn Vi ƀan xiâm Măt trâ̆n tơnêi têa Việt Nam Đỗ Văn Chiến hiăng tơmâng lăm pôu, rơkâu hâi tĭng kân Pâ Xeăng chu chiâng kuăn mơngế hơnăm 2022.