Hâi lơ 23/2, pôa Phan Đình Trạc, Ngế cheăng tung Khu xiâm pơkuâ tơdroăng kal kí, kăn pơkuâ tung khu xiâm Đảng, Kăn pơkuâ cheăng Tơnêi têa hiăng ai rôh pêi cheăng ƀă Khu pơkuâ hnê ngăn Đảng Cao Bằng. Tối tơbleăng ƀă khu kăn ki pêi dêi hnoăng cheăng, kăn pơkuâ kong pơlê Cao Bằng ăm ‘nâi: hơnăm 2022, ki mơdêk dêi kong pơlê châ 5,04%; kơxô̆ rơpŏng kơtiê kơdroh 4,29%; Tơdroăng gâk kring pơlê pơla, cheăm bêng; gâk kring tơdroăng kal kí, tơniăn tung pơlê pơla a kong pơlê châ rak vế; Hnoăng cheăng mơjiâng Đảng ƀă khu pơkuâ tơdroăng kal kí châ ‘mâi mơnhông krá tơniăn.

Hơnăm 2023, kong pơlê Cao Bằng kô pơtối mơdêk mâu troăng hơlâ tŏng kum mâu tơdroăng xơpá tung mơjiâng bro, tê mơdró; mơdêk hơ’lêh chêh pro hlá mơ-éa, hơ’lêh tơdroăng ki ‘no liăn cheăng tê mơdró ƀă tơkŭm ăm mâu kế tơmeăm, tơdroăng ki kal, tung mê ai troăng kân Đồng Đăng – Trà Lĩnh ƀă hên tơdroăng ki ê.

Pôa Phan Đình Trạc pơkâ thế kong pơlê Cao Bằng kal ai troăng hơlâ tŏng kum mâu tơdroăng ki xahpá, malối cho mâu tơdroăng ki ‘na troăng prôk. Tơtrŏng mơdêk ki rơkê tung mâu tơdroăng liăn ngân; mơdêk rĕng troăng hơlâ ‘no liăn pêi cheăng tơdjuôm ƀă pơtối tơ’mot ‘no liăn cheăng, malối cho ‘no liăn mơnhông cheăng kâ bo cheăng, mơnhông ôm hyô; pơtối mơdêk tơƀrê tơdroăng cheăng dêi kơ koan tơnêi têa; séa ngăn, pơkâ kơtăng pêi pro tro mâu tơdroăng pơkâ ‘na hbrâ mơdât kâ kơluâ; túa pơkâ tơleăng mâu tơdroăng ki kâ kơluâ; liăn ngân; pêi pro tro hnoăng cheăng hơ’lêh luât.