A roh tơdah, pôa Nguyễn Trọng Nghĩa xuân tơbleăng ƀă pôa Thongloun Sisoulith ‘na tơdroăng châ tơƀrê dêi Hneăng hôp tơpui tơno lĭ luâ̆n roh má 9 pơla péa Đảng, mơnhên Hneăng hôp tơpui tơno lĭ luâ̆n roh má 9 djâ tơdroăng lĭ luâ̆n kân, tơxâng pơkâ pêi pro dêi rêm Đảng, mâu tơdroăng xiâm tơpui tơno mơhno tơdroăng ki tá hiâm mơno, tơdroăng xiâm trâu hơhngế ƀă pơkâ hên troăng pêi ki pơxúa; mơnhên mâu kơ koan hriăn plĕng lĭ luân dêi péa Đảng kô pơtối tơrŭm krá tơniăn, thăm tơpui tơno tơdroăng lĭ luân, tối ki rơkê plĕng vâ rơtế pêi pro ƀlêi trâng Pơkâ Hneăng hôp dêi rêm Đảng.

Kăn xiâm pơkuâ hnê ngăn Đảng, Kăn xiâm hnê ngăn kong têa Lếo phiu ro tơdroăng châ tơƀrê dêi hneăng hôp ƀă pói vâ tung la ngiâ péa kơ koan pơtâng tối tơdroăng kal tơnêi têa, péa Hô̆i đong lĭ luâ̆n tơnêi têa pơtối tơrŭm krá tơniăn, thăm tối tơdroăng, tơpui tơno mâu tơdroăng ƀă tơdroăng hriăn plĕng ‘na lĭ luâ̆n, troăng tơmiât pêi ƀă pơtâng tối kum ăm tơdroăng pơkâ pêi troăng pêi ton xŏn, troăng hơlâ mơnhông mơdêk xuân môi tiah tơpui tơno túa ki rơkê tơtro tung tơdroăng mơjiâng chuh ngiah pơlê pơla a rêm kong têa.