Kơxê lơ 13/12, a Tíu pêi cheăng xiâm Đảng, pôa Nguyễn Phú Trọng, kăn xiâm pơkuâ hnê ngăn Đảng hiăng tơdah Khu kăn xiâm Khu pơtâng tối tơdroăng kal Tíu xiâm Đảng Nhân yân Kăch măng Lếo xua pôa Khăm-phăn Phởi-nhạ-vông, kăn pơkuâ ngăn tíu xiâm Đảng, kăn pơkuâ Khu pơtâng tối tơdroăng kal Tíu xiâm tơnêi têa, kăn hnê ngăn Hô̆i đong lĭ luâ̆n Tơnêi têa pơkuâ djâ, dế ai rôh pôu pêi cheăng a Việt Nam. Tơpui a rôh tơdah, pôa Nguyễn Phú Trọng, kăn xiâm pơkuâ hnê ngăn Đảng tối nhên tơdroăng ki ngăn nhuô̆m dêi Đảng, Tơnêi têa, kuăn pơlê Việt Nam ‘na tơrŭm cheăng ki tơviah môi hiâm mơno rế cho ngế pú tơrŭm rế cho nhŏng o, đi đo ƀă dêi rơpó tung rôh tơleăng lĕm hdroâng mơngế hdrối nah xuân môi tiah tung hnoăng cheăng mơjiâng ƀă rak vế Tơnêi têa hâi kố.

Kăn xiâm pơkuâ hnê ngăn Đảng mơnhên tối khât tơdroăng ki tơrŭm cheăng pơla péa Khu pơtâng tối xuân môi tiah klêi kơ’nâi rôh hôp tơpui tơno hiăng veăng kum kal khât tung ‘mâi mơnhông ƀă mơdêk krá tơniăn tơrŭm cheăng Việt Nam – Lếo, tơdrêng amê hlối pơkâ thế tung la ngiâ, péa pâ kal pơtối mơdêk khôi hmâ dêi tơná, pêi pro ƀlêi chiâng mâu hnoăng cheăng kal kí châ pơcháu, tơrŭm krá tơniăn, tơbleăng tơƀrê tơkêa kăn pơkuâ péa Đảng, péa tơnêi têa ƀă Tơkêa tơrŭm cheăng pơla péa Khu pơtâng tối Tơnêi têa.