Mâu kăn xiâm pơkuâ hnê ngăn Đảng, Tơnêi têa, Măt trâ̆n Tơnêi têa Việt Nam hneăng hdrối hiăng prôk ngăn tâ tá poăn pôa, ƀriê lo têa mâ, koh pơ’lâng pôa Nguyễn Phú Trọng, Kăn xiâm pơkuâ hnê ngăn Đảng – Kăn xiâm pơkuâ ki rơkê má môi, môi ngế ki djâ troăng ahdrối bâ eăng ‘na hriâm tâp, pêi pro tiô troăng tơmiât, túa rêh ối Hồ Chí Minh, ngế đảng viên Kŏng san hiâm mơno tơdrăng, châ Đảng, Tơnêi têa ƀă kuăn pơlê pin loi nhuô̆m, ai tŭm tâi tâng mâu tơdroăng ki lĕm tro,tuăn ngoâ rơkê, ivá khên tơnôu, ki klê plĕng dêi mâu rơxông kăn xiâm pơkuâ Việt Nam chal hơ’lêh nếo. Ƀă mâu tơdroăng ki síu hơ’nêng ó, pôa Tô Lâm, Ngế cheăng tung Khu xiâm kal kí, Kăn xiâm hnê ngăn tơnêi têa chêh tung kơxop hlá mơ-éa: “Síu hơ’nêng ó khât kơ pôa Nguyễn Phú Trọng - Kăn xiâm pơkuâ hnê ngăn Đảng – Ngế kuăn pâ nhuô̆m dêi hdroâng mơngế Việt Nam, Kăn pơkuâ ki rơkê má môi, ngế đảng viên kŏng san tơdrăng lĕm, môi ngế ki djâ troăng ahdrối bâ eăng ôh tá la lâi pơtê hriâm tâp, pêi pro tiô troăng tơmiât, túa cheăng, rêh ối Hồ Chí Minh, ngế ki châ loi nhuô̆m dêi Đảng, Tơnêi têa ƀă Kuăn pơlê pin, ngế pú kân dêi Kuăn pơlê lâp plâi tơnêi; ngế ki hiăng mơdoh tâi dêi rơxông, kơhnâ hâk git, pleăng ăm tơnêi têa, ăm Đảng, ăm Kuăn pơlê; ai hên hnoăng cheăng kân ƀă pleăng tơdroăng ki kân kĭn ăm tơdroăng cheăng kăch măng dêi Đảng ƀă hdroâng mơngế, ăm tơdroăng cheăng kŏng san lâp plâi tơnêi ƀă rak vế hơniâp lĕm, tơniăn, mơnhông tung kơpong ƀă a kong têa ê. Koh nhuô̆m, tu ko dêi tơná a ngiâ poăng châ pôa, ngin kô pêi pro, hriâm tâp tiô pôa,  tâi hiâm mơno, tâi ivá gum cheăng ăm Tơnêi têa, gum kuăn pơlê, tơrŭm, môi hiâm mơno, mơ-eăm pêi pro ƀlêi chiâng tơdroăng pơkâ vâ pêi mơjiâng tơnêi têa Việt Nam hơniâp lĕm, tơniăn krê, môi tuăn, kro mơdrŏng, rơkê plĕng, hơniâp ro ki pôa hiăng plâ rơxông tơmiât vâ pêi, mơ-eăm hlâ rêh”.

A kơxo lơ 25/7, hên khu kăn, mâu khu xiâm, kơvâ cheăng, mâu kong pơlê, pơlê kong kân tung lâp tơnêi têa hăng mot pôu ngăn pôa Nguyễn Phú Trọng - Kăn xiâm pơkuâ hnê ngăn Đảng ƀă veăng síu hơ’nêng rơtế ƀă rơpŏng hngêi pôa.