Tung kơthô rơkâu, pôa Dmitry Medvedev - Kăn xiâm pơkuâ hnê ngăn Đảng kong têa Rusi ki Môi tuăn tối loi khât, ƀă hnoăng cheăng pêi ‘na tơdroăng kal kí hiăng ton hơnăm dêi pôa ƀă ki rơkê, pôa Tô Lâm - Kăn xiâm pơkuâ hnê ngăn Đảng, Kăn xiâm hnê ngăn tơnêi têa kô ‘no hên hnoăng cheăng pêi tơƀrê ăm tơdroăng mơnhông cheăng kâ - rêh ối pơlê pơla ƀă tơdroăng pơkâ luât tơpui kâ tơniăn dêi Việt Nam; hlối loi khât tiah kố, tơdroăng tơrŭm cheăng pơla péa Đảng kong têa Rusi Môi tuăn ƀă Đảng Kŏng sản Việt Nam kô pơtối mơnhông tơƀrê tâ nếo xua tơdroăng vâ pro pơxúa ăm kuăn pơlê péa tơnêi têa. 

Tung kơthô chêh rơkâu dêi pôa Shii Kazuo - Kăn xiâm hnê ngăn Đảng Kŏng san Nhuk púi vâ ƀă loi khât péa Đảng kô pơtối tơrŭm krá kak, mơnhông tơrŭm cheăng kâ, trâm mâ, pro trâu rơdâ tơ’nôm tơdroăng tơrŭm cheăng pơla péa Đảng, mơnhông tơrŭm péa tơnêi têa. Rôh kố, pôa Manuel Pineda, Kăn xiâm pơkuâ hnê ngăn Đảng Măt trâ̆n Pro tơleăng lĕm Kuăn pơlê Sri Lanka, pôa Victor Lucas, Ngế pơkuâ xiâm khu kăn Tơpui kâ dêi Đảng Kŏng san Tây Ban Nha, Ngế xiâm pơkuâ Tơdroăng tơrŭm cheăng lâp plâi tơnêi dêi Đảng Tơrŭm kuăn pơlê Pơlê pơla chuh ngiah Egipto, pôa Fathi Alfadl - Kăn xiâm hnê ngăn Đảng Kŏng san Sudan xuân hiăng pơtroh kơthô, krếo phôn rơkâu kơ pôa Tô Lâm - Kăn xiâm pơkuâ hnê ngăn Đảng, Kăn xiâm hnê ngăn tơnêi têa.