A Bắc Kinh, Ngế cheăng tung Khu xiâm kal kí Tíu xiâm Đảng Kŏng san Sinuâ, Phŏ ngế pơkuâ Vi ƀan hneăng hôp mâu kăn kuăn pơlê tung lâp tơnêi têa, pôa Lý Hồng Trung hiăng tơdah pôa Bùi Quang Huy phŏ kăn hnê ngăn Vi ƀan Tíu xiâm Măt trâ̆n tơnêi têa Việt Nam, Kăn hnê ngăn má môi Tíu xiâm Đoân Droh rơtăm Kŏng sản Hồ Chí Minh, ngế pơkuâ khu lăm hriâm tâp droh rơtăm Việt Nam dế lăm pôu, pêi cheăng a Sinuâ.

Tơbleăng a rôh tơdah, pôa Lý Hồng trung tối nhên, péa pâ kal pêi kơtăng hnê mơhno dêi mâu kăn péa Đảng péa tơnêi têa ‘na tơdroăng mơdêk trâm mâ tơpui tơno pơla droh rơtăm Sinuâ - Việt Nam mơhnhốk  hơnăm ối nếo péa tơnêi têa veăng ‘no hnoăng tơná a tơdroăng mơjiâng mâu kuăn pơlê veăng hnê tối tung la ngiâ Việt Nam - Sinuâ ai pơxúa tŭm tơdroăng.

Pôa Bùi Quang Huy Kăn hnê ngăn má môi Tíu xiâm Đoân Droh rơtăm Kŏng sản Hồ Chí Minh tối, tơdroăng pêi pro,“ ki lĕm khêi, tăng ngăn hriâm ƀối” mơhno ki mơ-eăm, ‘nai hnoăng cheăng pêi tơná ƀă hnoăng ki djâ troăng a hdrối dêi droh rơtăm tung tơdroăng hriâm rak vế, ‘mâi mơnhông ƀă ôh tá la lâi pơtê mơnhông tơrŭm cheăng tung troăng hơlâ tâi tâng pơla péa tơnêi têa Việt Nam- Sinuâ, troh mơjiâng kuăn pơlê tối ăm dêi rơpó ‘nâi tung la ngiâ ai pơxúa.

Pôa Bùi Quang Huy - Kăn hnê ngăn má môi loi khât tiah kố, ing tơdroăng ki kố, mâu kăn hơnăm ối nếo kô ai rôh trâm mâ, tơpui tơno hriâm ing dêi rơpó, ing mê mơdêk hlê plĕng, tơrŭm ƀă po rơdâ mâu rôh tơrŭm tung la ngiâ pơla droh rơtăm dêi péa tơnêi têa.