Mâu hâi achê mơ’nui hơnăm, drêng tơdah tơmối lâp plâi tơnêi môi tiah Rusi, Hàn Quốc, Sinuâ... vêh, ôm hyô pơtối mơnhên hnoăng môi tung pŭn tíu cheăng kâ dêi kong pơlê Khánh Hòa. Teăng xua po rơdâ ƀă kơxô̆, kơvâ ôm hyô dế pơhlêh troăng pêi cheăng kâ ki dâi lĕm, kơjo mơnhông krúa lĕm ƀă krá tơniăn. Kăn hnê ngăn Khu tơrŭm Ôm hyô Khánh Hòa, pôa Phạm Minh Nhựt tối pơkâ pơhlêh nôkố cho ôh tá chiâng hrá:

‘’Ôm hyô krúa lĕm, ôm hyô krá tơniăn ôh tá xê to môi tơdroăng pơla mê xo, mê cho troăng pêi ki thế tiah mê dêi mâu khu pêi ôm hyô nôkố. Drêng tơkôm tơdroăng tŏng gum dêi mâu kơ koan pơkuâ tơnêi têa mê pin thế pêi pro tơdrêng ing nôkố vâ mơnhông ôm hyô krá tơniăn. Tơmối nôkố rế thăm tơmâng troh tơdroăng ki thế tiah mê mơnhông ngiât lĕm, rak vế kong prâi, drêng pin pơhlêh kô mơhnhôk châ kơxô̆ tơmối kố’’.

A kơpong cheăng kâ Vân Phong – kơpong ki mơnhông tơnêi têa tiô Pơkâ pêi tâi tâng tơnêi têa – Khánh Hòa dế mơhnhôk mâu khu mơ’no liăn cheăng tơmâng tŏng gum troăng pêi kơpong kơmăi kơmok sinh thái, tơtro ƀă troăng pêi la ngiâ “mơnhên troăng pêi tơtêk nếo, vêh pơhlêh tơdroăng cheăng kâ” tung Hlá Mơ-éa chêh hdrối Tơbleăng Kal kí. Tiê̆n sih Phạm Hồng Điệp, Kăn hnê ngăn Hô̆i đong Pơkuâ Kŏng ti tơlo liăn cheăng phon Shinec, tíu pêi cheăng mơnhông kơmăi kơmok cheăng krúa lĕm a Hải Phòng ƀă nôkố hriăn plĕng mơ’no liăn cheăng a Khánh Hòa tơpui tối tiah mê:

‘’Ai 3 -4 khu kơmăi kơmok kal ‘măn ăm krê môi kơpong ăm pêi cheăng vêh pro tơmeăm ki hvât, trếo ki mơ’no lo pakong kơmăi kơmok. Xua tâng ôh tá tŭm troăng pêi kố, mâu tơdroăng tơdjâk kong prâi kô chiâng tíu mơdât kân ăm tơdroăng mơnhông krúa lĕm. Tơnêi têa nôkố xuân dế mơhnhôk troăng pêi vêh pro tơmeăm ki hvât tah, cheăng kâ vêh mơjiâng cheăng đi đo’’.

Khánh Hòa dế mơhnhôk mâu tơdroăng tơkêa bro hngêi trăng troăng klông ton xŏn tung kơvâ kơno têa kơxĭ –  logistics, kơpong hngêi kơmăi kơmok krúa lĕm, kŏng ngê̆ rơxông nếo ƀă ôm hyô ki dâi lĕm a kơpong cheăng kâ Vân Phong, Cam Ranh ƀă kơpong ki achê ai ivá mơnhông Peăng hdroh pá tơdế Tơnêi têa. Rơtế mơhnhôk mơ’no liăn cheăng, kong pơlê mơdêk pơhlêh pro mơ-éa, xúa troăng pêi ‘’môi péa - tơkŭm môi tíu’’, xúa kŏng ngê̆ tung pêi cheăng ƀă tơbleăng tơdrăng tơdroăng pro mơ-éa.

Kơnôm mơnhên inhên hnoăng cheăm rêm tíu pêi cheăng, kơvâ cheăng, tung pơla pro hên mơ-éa mơ’no liăn cheăng - tơnêi tơníu – mơjiâng tơmeăm kơdroh 30 – 40%; mâu mơ-éa tơdjêp hên tíu pêi cheăng châ kơdroh ing to lâi khế chu u ối to lâi măng tĭng. Pôa Trần Minh Chiến, Kăn pơkuâ Khu pơkuâ Khu cheăng kâ ƀă mâu kơkoong kơmăi kơmok kong pơlê Khánh Hòa tối ăm ‘nâi, pơkâ pêi cho mơjiâng môi troăng pêi tơdjêp ƀă tơdrăng, tơtro ƀă troăng prôk la ngiâ pơhlêh nếo troăng pêi tơtêk.

Khu pơkuâ pro khu ki pêi lâp lu tŏng gum khu mơ'no liăn cheăng séa ngăn, pro hô sơ, hbrâ pơkâ pêi troh tăng tơnêi ƀă tơdjêp mâu khu, kơvâ cheăng vâ tơdroăng tơkêa bro châ pêi pro tơ’lêi hlâu tâ.

‘’Kô chiâng krếo mâu khu mơ’no liăn cheăng, ngin pơhlêh troăng tơmiât pơkuâ troh pơhlêh tơmiât rơtế prôk, rơtế mơ’no liăn cheăng tơleăng pơloăng mơnúa. Ngin kô cho khu hnê mơhno rơkê ‘na kơvâ mơ’no liăn cheăng, gum khu mơ’no liăn cheăng ai hên tơdroăng ki nếo ai, tơdjêp tíu pơkuâ tơnêi têa vâ khu mơ’no liăn cheăng tơ’lêi hlâu má môi vâ pêi pro tơdroăng tơkêa bro’’.

Hên tơdroăng tơkêa bro ton xŏn dế châ Khánh Hòa kơbông krếo tung hneăng hơnăm 2025 – 2030, tơkŭm a tơmeăm khoăng logistics, kơno tuk têa kơxĭ pơto tơmeăm lâp plâi tơnêi, kơpong hngêi kơmăi kơmok krúa lĕm – kơmăi kơmok rơxông nếo, kơpong tê mơdró tơ’lêi hlâu. Kố cho mâu pơkâ tơtro ƀă troăng pêi la ngiâ mơjiâng ‘’mâu tíu xiâm pơkuâ liăn ngân lâp plâi tơnêi, kơpong tê mơdró tơ’lêi hlâu rơxông nếo” ƀă “kơpong cheăng kâ têa kơxĭ hên kơvâ” châ tối tung Mơ-éa chêh hdrối Tơbleăng Kal kí.

Rơtế ƀă tơdroăng po rơdâ roh tơ’lêi, kong pơlê pơkâ rah xo khu mơ’no liăn cheăng sap ing apoăng vâ ví tơdroăng tơkêa bro ki lôi ton, hrá pêi pro lơ ôh tá ai ivá pêi cheăng. Pôa Nghiêm Xuân Thành, Kăn pơkuâ hnê ngăn cheăng Đảng kong pơlê Khánh Hòa tối rơdêi:

‘’Mâu khu tê mơdró ai ivá thế tơkêa. Tâng ôh tá ai ivá mê thế pêi, ôh tá tơkŭm séa ngăn apoăng, tơkôm séa ngăn kơ’nâi, kô lôi ăm ai hên tơdroăng ki ôh tá tro. Xua mê, kal ƀeăn ƀĕng pơhlêh ing séa ngăn apoăng troh séa ngăn kơ’nâi ƀă rah xo apoăng. Rah xo apoăng cho kal khât. Troăng pêi kố pôi tá djâ tơdroăng pêi pro mơ-éa cheăng kâ rêh ối ƀă tơnêi têa hngăm hngo, mê tiô a tơdroăng pơkâ xúa AI, tơmeăm ki mơnhên inhên, gum kơdroh iâ hâi khế pêi tiô tơdroăng tơkêa bro’’.

Ngăn tơdjuôm tâi tâng, ing ôm hyô krúa lĕm troh kơmăi kơmok têk chu chu têk, ing pơhlêh pro mơ-éa troh pơhlêh nếo troăng tơtêk, Khánh Hòa dế inhên hiêm mơno dêi Tơdroăng tơkêa bro Tơbleăng dêi Kal kí Hneăng hôp má XIV – mơnhông rĕng, krá tơniăn ƀă tiô mâu ivá nếo. Drêng tơdroăng tơmiêt pêi cho thế pêi apoăng, drêng khu mơ’no liăn cheăng châ rah xo tơdrăng ƀă drêng tơtêk prôk ƀă rak vế kong prâi, Khánh Hòa ai tŭm xiâm kối vâ kơteăng mot tung hneăng tơtêk péa to kơxô̆, chiâng tơdroăng ki tơtêk nếo dêi kong tơbăng achê têa kơxĭ Nam Trung Bộ ƀă lâp tơnêi têa.