Pôa Nguyễn Hoà Bình, Phŏ Ngế pro xiâm hnê ngăn hiăng séa mơnhên ngăn ki păng ‘nâng 2 tơdroăng tơkêa bro “rơpâu rơtal liăn”, cho Tơdroăng Tơkêa bro a kơpong khu kuăn pơlê Cồn Tân Lập, bêng Nha Trang, ƀă Kơpong kơphô̆ ki nếo Mỹ Gia, bêng Tây Nha Trang. Tơdroăng tơkêa bro mơjiâng kơpong kuăn pơlê rêh ối Cồn Tân Lập ga ai hên tơdroăng ki xôi kân tung pơla rah xo tơdroăng vâ mơjiâng pro, ai hên tơmeăm khoăng hiăng pơtê sap ing ton nah. Kuăn pơlê a mâu pơlê cheăm, bêng xuân pói rơhêng vâ tơdroăng tơkêa bro mê thâ rĕng pêi pro klêi vâ ‘mâi rơnêu um méa thôn pơlê, kơphô̆. Tơdroăng tơkêa Bro kơpong kơphô̆ ki nếo Mỹ Gia xuân ối trâm hên tơdroăng ki pá ‘na hnoăng cheăng liăn ngân, ing mê, dế châ mâu khu pơtối lăm séa mơnhên ngăn hên khât.

Lâp kong pơlê Khánh Hoà hiăng tí tăng mơnhên, pôu râng hnoăng cheăng, pâ thế mâu khu râ, kơvâ cheăng ki ai hnoăng pơkuâ vâ mơnhên ngăn, mơdrếo tơvêh xo liăn ki tro hía mê châ 1.100 rơtal liăn. Maluâ ti mê, tung pơla ‘mâi rơnêu mâu tơdroăng ki mê dế trâm hên mâu tơdroăng ki kreăng tơvâ xua mâu tơdroăng tơkêa bro ôh tá rah xo pêi pro, ôh tá po hneăng tăng rah xo mâu ngế ki mơ’no liăn cheăng, lơ tơbriât rah xo ƀă yă ki tơtro, ôh tá pơkâ yă ki vâ tê rôe. Pôa Nguyễn Hoà Bình, Phŏ Ngế pro xiâm hnê ngăn hiăng tối mơnhên, troăng pơkâ pê mê dêi Chin phuh cho tơkŭm tah lôi mâu tơdroăng ki pá puât ăm mâu tơdroăng tơkêa bro ki u ối cho vâ tah lôi mâu tơdroăng ki pro mơhrê liăn ngân, kế tơmeăm tung pơlê pơla ƀă hnối mơjiâng tơ’nôm ivá ki ó rơdêi vâ mơnhông:

“Ing tơdroăng ki rơkê plĕng mê dêi tơdroăng ki tah lôi ki xahpá tiô Tơdroăng pơkâ 170 ga ai hên mâu kong pơlê, tung mê ai tá Khánh Hoà, xuân riân ta Khánh Hoà ton nah, Ninh Thuận ton nah, pin ối pơtối âi mâu tơdroăng tơkêa bro ki ê xuân ối trâm hên tơdroăng ki kreăng tơvâ, kal athế pơtối tah lôi mâu tơdroăng ki xahpá. Tâng lơ u ối mâu tơdroăng ki tơvâ tơvân mê, mâu kuăn mơngế, liăn ngân, kế tơmeăm dêi pơlê pơla ki ahdrối tâ cho mơhrê liăn ngân, pro pá ăm ‘na kuăn mơngế ki cheăng la ôh tá tơƀrê. Ki má péa nếo, mơ’nhê chôu phut, hâi khế, mơdon ing hơnăm kố troh hơnăm ê, kuăn pơlê tô tuăn ó”.

Cheăng kơmăi kơmok ƀă Hyôh kong prâi cho 2 tung 4 tơdroăng ki xiâm châ thăm mơdêk, châ tôí mơnhên tung tơdroăng pơkâ kơxô̆ 01 dêi Khu kăn pơkuâ hnê ngăn Đảng ủi kong pơlê Khánh Hoà. Dế nôkố, lâp kong pơlê hiăng ai 33 kơpong cheăng kơmăi kơmok hiăng châ vê hdró, tâi tâng kơxô̆ ƀă tơnêi vâ pê mê ai lối 1.400 ha. A kơvâ on tơhrrik, kong pơlê hiăng pơkâ, vê, hdró 60 tơdroăng tơkêa bro ƀă tâi tâng ivá on tơhrrik châ 8.525 MW. Pôa Hồ Xuân Ninh, Kăn hnê ngăn cheăng kơmăi kơmok, tê mơdró dêi kong pơlê Khánh Hoà tối ăm ‘nâi, ƀă tơdroăng ki séa ngăn, rế krếo thế mơ’no liăn gum, mê kong pơlê dế mơjiâng chiâng hnoăng ki xiâm vâ tơdroăng cheăng kơmăi kơmok ƀă ivá cheăng kô chiâng 2 tơdroăng ki xiâm tung pêi lo liăn ngân, kế tơmeăm, ing mê, veăng gum ăm tơdroăng pêi cheăng kâ dêi kong pơlê châ tơtêk hên tâ tung hneăng ki nếo.

“Kong pơlê Khánh Hoà dế tơkŭm tơleăng mơnhên, tah lôi mâu tơdroăng tơkêa bro ki ối trâm hên tơdroăng kreăng tơvâ, ki rơhêng vâ tối cho tung kơvâ cheăng kơmăi kơmok, on tơhrrik, tâng vâ tối, tơkéa vâ tối hiăng tah lôi mâu tơdroăng cheăng ki xiâm. Bu u ối iâ xo mâu tơdroăng tơkêa bro, Khu ngăn ‘na cheăng kơmăi kơmok ƀă tê mơdró kô pơtối tối pơtâng ăm Vi ƀan hnê ngăn kong pơlê tah lôi, ing mê, vâ thăm mơdêk ivá cheăng ƀă mơ’no mâu tơdroăng tơkêa bro kố veăng tung tơdroăng pêi lo liăn ngân. Drêng tơmot péa kong pơlê Ninh Thuận ƀă Khánh Hoà, mâu tơdroăng tơkêa bro kal athế seá mơnhên ngăn, ‘mâi rơnêu, ƀă séa mơnhên ngăn ƀă mâu luât vâ pơkâ pêi pro mâu tơdroăng ki mê tơtro hên tâ.”

Tơno ‘na troăng hơlâ ki tah lôi mâu tơdroăng ki vâ ‘mâi rơnêu, mơ’no cheăng tiô túa cheăng kơmăi kơmok ƀă hyôh on tơhrik cho 2 tơdroăng ki vâ mơnhông kân khât, Vi ƀan hnê ngăn kong pơlê Khánh Hoà hiăng pơkâ thế mâu khu râ, kơvâ cheăng vêh mơnhên ngăn tâi tâng mâu tơdroăng ki ai tơdjâk troh, môi tiah túa pêi pro, hngêi trăng, troăng prôk, kuăn mơngế, ‘mâi rơnêu, tah lôi mâu tơmeăm khoăng ki tơvâ troăng prôk; tơdrêng amê, vêh mơnhên tối hnoăng cheăng ki nhên, kơjo gum mâu tơdroăng cheăng ki tơdrêng ƀă ai mâu tơdroăng tơkêa bro veăng gum mơjiâng chiâng ki kơnía kân khât vâ tơkŭm pơkâ pêi pro.

Mâu khu ki mê athế pêi pro kơtăng khât tung tơdroăng ‘mâi rơnêu tơdroăng ki mơ’no liăn ngân, hbrâ pêi pro dêi xêh vâ tah lôi mâu tơdroăng ki păng ‘nâng, tơdrêng amê, pôu râng hnoăng cheăng ki tah lôi mâu tơdroăng ki xahpá, kreăng tơvâ dêi khu mơdró kâ, mâu ngế ki mơ’no liăn cheăng.