Tiô riân roh apoăng, Dak Lak tối ai 1 ngế hlâ; hên hngêi tơtêa kuâ, mâu tíu ‘nâ tơhnâp, tơmeăm khoăng tơ’nhiê xua têa plế mot, mâu troăng prôk tro têa lu. Đăi tă Lê Văn Hùng, Phŏ pơkuâ xiâm, tăng ‘nâi plĕng dêi Khu ngăn ‘na lêng kong pơlê Dak Lak ăm ‘nâi,  tung kơmăng mê, hrĭng ngế kăn ƀô̆, mâu lêng hiăng hbrâ rơnáu, prôk lăm ukố umê ƀă ca-nô ƀă mâu tơmeăm khoăng hmâ xúa troh a mâu kơpong têa lu trâu, kơpong ki tro tơklâ vâ djâ kuăn pơlê, mâu ngế hơnăm hiăng krâ, vâi hdrêng lăm ối tíu tơniăn.

Klêi khía mơhot kân bro, tung kơmăng, pôa Đào Mỹ, Phŏ kăn hnê ngăn Vi ƀan kuăn pơlê kong pơlê Dak Lak, Ngế xiâm pơkuâ  ngăn a bêng Sông Cầu hiăng troh lăm ngăn tíu mê, hnê mơhno pêi mâu tơdroăng tơkâ luâ xơpá, malối tơbleăng hdrối ăm tơniăn drêng kuăn pơlê vêh mơgrúa hngêi trăng, ví trâm xía vâ xua on tơhrik, xua loăng tơđôu, ƀă mâu kế tơmeăm ki xía vâ klêi khía mơhot kân bro.

Nôkố, mâu khu râ pơkuâ cheăng a Dak Lak pơtối hbrâ gak ngăn plâ hâi măng, tăng ngăn mâu kơpong ối tro têa lu, kum kuăn pơlê vêh dêi a hngêi, rak tơniăn tung rêh ối, mơgrúa hngêi trăng loăng plâi, séa ngăn tơniăn on tơhrik, vâ ‘mâi mơnhông tơdroăng rêh ối ƀă tơmeăm khoăng châ tơniăn, kuăn pơlê pơtối châ pêi klâng chiâk.

-Mơnhên ngăn roh apoăng, lâp kong pơlê Gia Lai ai 2 ngế hlâ. Pakĭng mê, 2 ngế ối a bêng Quy Nhơn ƀă bêng Anh Nhơn tro rong. Tiô riân ngăn apoăng, a Gia Lai ai 45 toăng hngêi tơhnâp tâi tâng, lối 2.400 toăng hngêi tơtêa kuâ. Khía mơhot kân roh má 13 xuân pro 1 toăng tuk tro krăm, 3 tíu troăng klông a cheăm An Vinh tơhnâp. A kơpong Hoài Nhơn Bắc, têa kơxĭ đik kân pro lân lu lối 3.000 rơpŏng kuăn pơlê a kĭng têa kơxĭ, ki trâu lân lu sap ing 10 – 40 cm, ai tíu đik tâk troh 80 cm.

Rơpâu ha báu alâi ƀă prá tro tơ’nhê, hên kơpôu, ro, chu, í peâp hlâ; loăng ngiât, trăng on tơhrik, kơƀăng ki tâp tơbleăng chư chêh, ‘măng nhĕng tro tơpê tơhneăng kơtong, tơ’nhê. Lâp kong pơlê hía on tơhrik tung kơpong rơdâ, troăng hyôh phôn xuân hía, troh drêng tơbleăng tá hâi riân tá hâi chiâng vâ rơnêu tâi tâng.

Nôkố, hên pơlê xuân dế pơtối séa ngăn, riân ngăn tơdroăng tro lŭp, xua mâu kơpong tá hâi chiâng vâ prôk lăm troh dêi a rơpó, tá hâi chiâng vâ tơpui ƀă dêi pó.

-A Quảng Ngãi, tiô riân hâi teăm tŭm, 50 toăng hngêi tro tơtêa kuâ, tơ’nhiê, krê a cheăm Long Phụng hiăng tro tơ’nhiê hên má môi, ai 45 toăng hngêi xua jâ kơđo pro tơtêa kuâ. Tơdroăng mê ăm hlo, kơpong kĭng têa kơxĭ ƀă kơpong a’nâi xuân cho tíu ki tro tơdjâk ó drêng ai khía tơkâ luâ. ‘Na troăng prôk, hên troăng kân xiâm tro tơ’nhiê. Tơdroăng mê ăm hlo ki rơ-iô tơnêi tơhnâp a kơpong kong ngo xuân hên, malối drêng tơnêi hiăng ai têa lân lu.

Nôkố mâu cheăm bêng dế pơtối riân ngăn vâ ‘nâi tơmeăm ki tro tơ’nhiê, tơkâ luâ xơpá pơtân, hlối tăng ngăn nhên mâu kơpong ki ôh tá tơniăn vâ ăm kuăn pơlê châ hdâ ối a tíu ki tơniăn.