Kơxo lơ 22/2, a tíu pêi cheăng Khu xiâm pơkuâ liăn ngân, Khu hnê mơhno 389 tơnêi têa tơkŭm po Hneăng hôp mơgêi tơdroăng pêi cheăng hbrâ mơdât mơngế tê mơdró liu, lu lêa tung têa mơdró ƀă tơmeăm ki ôh tá xê khât hơnăm 2022 ƀă troăng pêi la ngiâ, hnoăng cheăng xiâm hơnăm 2023. Pôa Hồ Đức Phớc, Ngế xiâm rak liăn ngân, Kăn xiâm phŏ hnê mơhno má môi Khu hnê mơhno 389 tơnêi têa pơkuâ Hneăng hôp.

A Hneăng hôp, tối tơbleăng dêi Khu hnê mơhno 389 tơnêi têa, pôa Lê Thanh Hải, Kăn pơkuâ ƀơrô Hnê mơhno má môi Khu hnê mơhno 389 tơnêi têa tối nhên, hơnăm 2022, khu cheăng lâp tơnêi têa hiăng châ hlo, rup, pơxâu phak vâ chê 140 rơpâu roh tơdroăng pro xôi, tâk 1,17% tâng pơchông ƀă roh kố hơnăm 2021.

Vâ pêi pro châ tơƀrê tơdroăng hbrâ mơdât tê mơdró liu, lu lêa tung tê mơdró ƀă tơmeăm ki ôh tá xê khât hơnăm 2023, Khu hnê mơhno 389 tơnêi têa pơkâ Khu hnê mơhno 389 mâu khu xiâm, kơvâ cheăng, kong pơlê ối tung tơnêi têa hbrâ ‘nâi nhên, tối hdrối tro tơdroăng; mơnhên troăng prôk, pơlê, mâu ngế ki xiâm, tơmeăm, tơdroăng pêi ki hôm; kơnó troăng pêi, troăng pêi ki ôh tá lĕm, pơkâ mâu troăng pêi tơtro vâ tơplâ mơdât, mơdât châ tơƀrê mâu tơdroăng tê mơdró liu, lu lêa tung tê mơdró ƀă tơmeăm ki ôh tá xê khât ối tung kơvâ, kơpong pơkuâ.