Hâi lơ 24/2, Khu kăn Kuô̆k hô̆i dêi kong pơlê Dak Lak hiăng ai roh pôu, pêi cheăng ƀă Vi ƀan hnê ngăn kong pơlê ‘na rak vế, pêi pro tiô troăng hơlâ, luât ‘na mơnhông mơjiâng on tơhrrik hneăng 2016-2021. La ngiâ kố ah, Vi ƀan hnê ngăn kong pơlê Dak Lak pâ thế Chin phuh hbru kum ăm tơdroăng mơjiâng on tơhrrik kơtâu ƀă khía, on tơhrik kơtâu ƀă tô trâ mâ hâi, yă rôe on tơhrik kơtâu ƀă hyôh khía, on tơhrrik kơtâu ƀă tô trâ mâ hâi; rĕng mơ’no troăng hơlâ ki pơkâ yă ƀă tơdroăng tê rôe on tơhrik ƀă tơdroăng ki mơjiâng pro hngêi kơmăi on tơhrik kơtâu ƀă hyôh tô trâ dêi mâ hâi, on tơhrik kơtâu ƀă khía ki tơdjêp tơ’môe tiô troăng kơxái on tơhrik ki kân xŏn.

Tơpui a chôu phut mơnhên tối mê, jâ Lê Thị Thanh Xuân, Kăn phŏ pơkuâ ngăn khu kăn Kuô̆k hôi dêi kong pơlê Dak Lak pâ thế Vi ƀan hnê ngăn kong pơlê mơjiâng tơdroăng vâ pêi pro, séa mơnhên vâ pơtroh tơdroăng kố ăm Khu kăn xiâm Kuô̆k hô̆i tah lôi mâu tơdroăng ki xahpá, pơloăng mơnúa, tơvâ tơvân, tŏng kum mơnhông pêi cheăng kâ-rêh ôí pơlê pơla a kong pơlê kố. Tơdrêng amê, pâ thế Vi ƀan hnê ngăn kong pơlê thăm rế mơdêk tơdroăng pơkuâ ngăn tơnêi têa tung rak vế, pêi pro tiô troăng hơlâ luât ‘na mơnhông mơjiâng on tơhrik a kong pơlê tiô kơ tơdroăng séa mơnhên ngăn ki achê tơtro.