Khu hnê mơhno má môi pơkuâ hnê ngăn Đảng Kon Tum pơkâ thế Vi ƀan kong pơlê hnê mơhno nhên xiâm kối, pơxâu phâk kơtăng tơdroăng roh on chếo kong pêt loăng bat đâng pro 2 ngế hlâ a cheăm Hơ Moong, tơring Sa Thầy.

Tơdjâk roh chếo kong pêt loăng ƀat đâng a cheăm Hơ Moong, tơring Sa Thầy a hâi lơ 7/3 pro 2 ngế veăng tơpâ on hlâ, kơxo lơ 14/3, Ƀơrô Khu kăn pơkuâ hnê ngăn Đảng kong pơlê Kon Tum ai hlá mơ-éa pơtroh Khu pơkuâ Đảng Vi ƀan kong pơlê tối rơkong tơpui dêi Khu hnê mơhno má môi Khu pơkuâ hnê ngăn Đảng Kon Tum pơcháu Khu pơkuâ Đảng Vi ƀan kong pơlê hnê mơhno thâ séa ngăn, mơnhên xiâm kối ƀă pơxâu mâu ngế pôu râng hnoăng dêi khu pú hên, ngế krê ki ai tơdjâk lôi ăm ai roh tơdroăng kố. Tơdroăng mê tơbleăng Khu hnê mơhno má môi Khu kăn pơkuâ hnê ngăn Đảng hdrối hâi lơ 25/3/2023.