Tơdroăng ăm ‘nâi a hâi hôp, tung khế 10/2024, cheăng kâ - rêh ối pơlê pơla dêi kong pơlê Dak Lak pơtối xông tơniăn, tâi tâng mâu pơkâ xuân tâk tâng vâ pơchông ƀă hơnăm 2023.

Kăn hnê ngăn Đảng kong pơlê Dak Lak Nguyễn Đình Trung pơkâ thế rêm râ a kong pơlê kal tơkŭm pơkuâ hnê mơhno ƀă tơkŭm pêi mâu tơdroăng cheăng dêi hơnăm  2024; tơkŭm pê klêi Leh tơbâ 120 hơnăm Hâi mơjiâng kong pơlê; hbrâ nhên vâ tơkŭm po Hneăng hôp kân Đảng ƀô̆ kong pơlê rôh má 18; thâ tơbleăng pơkâ hdró kơpong Tây Nguyên, pơkâ hdró kong pơlê Dak Lak pơla hơnăm 2021-2030, mâu tơdroăng vâ pêi troh hơnăm 2025 tiô pơkâ; mơdêk rĕng mơjiâng Tơdroăng tơkêa bro troăng kân tơdrăng lĕm Khánh Hòa- Buôn Ma Thuột.