Lối hrĭng khu mơdró kâ a kong pơlê Lâm Đồng dế trâm pá xua ôh tá ai mâu ngế pêi cheăng, malối cho mâu ngế pêi cheăng ki hiăng rơkê tung mâu kơvâ pêi chiâk deăng. 3 khế hdrối nah, maluâ nâ Nguyễn Thị Bích Thủy, Kăn phŏ pơkuâ Kŏng ti pêi cheăng tiô rơnó Biofresh a pơlê kong kơdrâm Đà Lạt chêh mơ’no hên tơdroăng ki rah xo mâu ngế pêi cheăng, đi đo tơpui ƀă Tíu xiâm tơbleăng cheăng pêi kong pơlê Lâm Đồng vâ tăng mâu ngế pei cheăng tơtro la xuân ối ai kơbố.

Tiô pôa Hoàng Trọng Vinh, Kăn pơkuâ Tíu xiâm tơbleăng tơdroăng cheăng kong pơlê Lâm Đồng, nôkố lâp kong pơlê ai 780 khu mơdró kâ dế kal mâu ngế pêi cheăng, ƀă lối 1 rơpâu tơdroăng cheăng hên khu kơvâ cheăng, môi tiah: tê mơdró, ôm hyô, pêi chiâk deăng, pơchoh hmân ếo ƀă hên ki ê. Ki hên mâu khu mơdró kâ kố mơ’no kơlo liăn kâ tơniăn ƀă tơdroăng ki ăm tơ’nôm liăn la xuân xơpá tăng mâu ngế pêi cheăng, malối cho mâu ngế pêi cheăng ki rơkê tung tơdroăng cheăng pêi dêi tơná môi tiah kih sư pêi chiâk deăng, rak ngăn tê mơdró, pơkuâ po mâu kơmăi kơmok.