Kơxo lơ 14/8, Khu pơkuâ hnê ngăn cheăng Đảng kong pơlê Dak Lak mơgêi 10 hơnăm pêi pro Pơkâ kơxô̆ 33 dêi Khu xiâm pơkuâ Đảng hneăng má XI ‘na ‘’mơjiâng ƀă mơnhông khôi túa lĕm kuăn mơngế Việt Nam tơxâng pơkâ krá tơniăn tơnêi têa’’ ƀă 15 hơnăm pêi pro Pơkâ kơxô̆ 38 dêi Khu xiâm pơkuâ hnê ngăn Đảng ‘na “Mơdêk tơdroăng pêi cheăng ƀaoh hiêm khăm pơlât tung rơxông nếo’’.

Hluâ 15 hơnăm pêi pro Pơkâ kơxô̆ 38 dêi Khu pơkuâ hnê ngăn cheăng Đảng, troăng hơlâ ƀaoh hiêm khăm pơlât hiăng châ tơƀrê trâu rơdâ tung tơdroăng rêh ối pơlê pơla, ai mâu tơdroăng veăng gum ki kal tung tơdroăng gâk kring, rak ngăn ƀă mơdêk ivá kuăn pơlê. Hluâ 10 hơnăm pêi pro, kong pơlê Dak Lak hiăng ai lối 398.000/463.000 rơpŏng khôi túa lĕm, châ 86%. Khôi hmâ tiô vâi krâ nah lĕm tro dêi kuăn pơlê mâu hdroâng kuăn ngo pơtối châ vêh pro, rak vế ƀă pro ăm hôm lĕm tá mê nếo.

Pôa Nguyễn Đình Trung, Kăn pơkuâ hnê ngăn cheăng Đảng kong pơlê Dak Lak mơnhên ƀă kheăn kơdeăn tơdroăng mơ-eăm dêi mâu khu râ, mâu kơvâ cheăng tung pêi pro Pơkâ 33 ƀă tơdroăng thế pêi pro kơxô̆ 38 dêi Khu pơkuâ hnê ngăn cheăng Đảng tung kong pơlê.