Tung mâu hâi apoăng hơnăm nếo, khu râ kăn pơkuâ cheăng Đảng kong pơlê, Vi ƀan kuăn pơlê, Hô̆i đong kuăn pơlê ƀă Vi ƀan Măt trâ̆n Tơnêi têa kong pơlê Dak Lak hiăng mơjiâng 4 khu râ kăn pêi cheăng vâ troh lăm pôu, trâm mâ kăn ƀô̆, mơngế cheăng mâu kŏng ti, tiú cheăng tung kong pơlê vâ mơhnhôk mâu tíu cheăng tơkâ hluâ pá puât, châ tơƀrê tung hơnăm 2023. A hngêi kơmăi Ƀier Sài Gòn Dak Lak, pôa Phạm Ngọc Nghị, Kăn phŏ hnê ngăn pơkuâ cheăng Đảng kong pơlê, Kăn hnê ngăn Vi ƀan kuăn pơlê kong pơlê rơtế khu râ kăn pêi cheăng hiăng troh lăm pôu kơpong pêt mơjiâng tơmeăm, trâm mâ, tơpui tơno ƀă mâu kŏng nhân ƀă pêi cheăng ƀă Khu râ kăn pơkuâ hngêi kơmăi kơmok.

Teăng mâ khu râ kăn pơkuâ kong pơlê, pôa Phạm Ngọc Nghị kheăn kơdĕn ƀă mơnhên păng ‘nâng tơdroăng mơ-eăm tơkâ hluâ pá puât dêi Hngêi kơmăi Ƀier Sài Gòn Dak Lak tung hơnăm 2022. Tơdrêng amê pói vâ ƀă tơdroăng châ tơƀrê hiăng châ tung hơnăm hiăng hluâ, hngêi kơmăi pơtối mơnhông mơdêk khu pêi cheăng, djâ tơdroăng pêt mơjiâng tơmeăm, tê mơdró châ tơƀrê hên tung la ngiâ.