Tiô tối tơbleăng a rôh pêi cheăng, sap hơnăm 2020 troh 2022, kong pơlê Dak Lak hiăng mơhnhôk tăng liăn ngân, kơxô̆ liăn 986 rơtal 632 rơtuh liăn ăm tơdroăng hbrâ mơdât COVID-19. Kong pơlê mơhnhôk tăng liăn ƀă xo ing khu râ, mâu ngế tung tơnêi têa ƀă kong têa ê veăng kum 71 rơtal 355 rơtuh liăn. Ing kơxô̆ liăn mê, mâu kơ koan, tíu pêi cheăng hiăng tơbleăng ‘no rôe tơmeăm xúa, pơkeăng, mâu tơmeăm xúa tung khăm pơlât vâ ai tiô tơdroăng pơkâ hbrâ, mơdât pơreăng COVID-19 a kong pơlê.

Kơvâ ngăn pơkeăng kong pơlê Dak Lak xuân hiăng tơmâng hnê mâu kăn ƀô̆ ngăn pơkeăng cheăm ƀă hbrâ mơdât pơreăng. Ing mê mơdêk ivá séa ngăn mơdât pơreăng, rĕng châ ‘nâi, tơkŭm mơdât mâu pơreăng ƀă kâi mơdât teăm tơdrêng.

Pôa Dương Thanh Bình, Ngế pơkuâ hnê mơhnhôk, Vi ƀan pơkuâ cheăng Kuô̆k hô̆i tối pơchân kong pơlê kal tối tơ’nôm tơdroăng ăm mâu ngế cheăng a hngêi pơkeăng, kong pơlê, tơring vêh a cheăm rak ngăn, mơnhên  hnoăng cheăng pêi dêi hngêi pơkeăng cheăm, bêng ƀă tơdroăng khăm pơlât ƀăng ƀaoh hiêm khăm pơlât; mơdêk ki tơƀrê tung khăm pơlât a hngêi pơkeăng tơring vâ kơdroh ki hâ ho mơngế pơlât râ kơpêng; tơmâng tơ’nôm ‘na kơxô̆ liăn ‘no ăm mâu hngêi pơkeăng cheăm tung kong pơlê.